ఇమ్రాన్ ఖాన్ చనిపోలేదు... జైల్లో దర్జాగా జీవిస్తున్నారట!
పాకిస్తాన్ మాజీ ప్రధాని, మాజీ క్రికెటర్ ఇమ్రాన్ ఖాన్ రావల్పిండి జైల్లోనే హత్య చేయబడ్డారని బుధవారం దేశవ్యాప్తంగా పుకార్లు మొదలయ్యాయి. ఆయన చనిపోయినందునే కుటుంబ సభ్యులు ఎవరినీ లోనికి వెళ్ళి ఆయనని కలిసేందుకు జైలు అధికారులు అనుమతించడం లేదని ప్రచారం జరిగింది.
ఈ వార్తలు భారత్‌తో సహా పలు దేశాల మీడియాలో కూడా వచ్చాయి. కానీ జైలు అధికారులు అవన్నీ వట్టి పుకార్లే అని కొట్టి పడేశారు. అయన జైల్లో ఆరోగ్యంగా ఉన్నారని మీడియాకు తెలిపారు. కోర్టు ఆదేశాలు, భద్రతా కారాణాల వలననే ఆయనని కలిసేందుకు ఎవరినీ అనుమతించడం లేదని జైలు అధికారులు చెప్పారు.
పాక్‌ రక్షణ మంత్రి ఖవజా ఆసీఫ్ ఇస్లామాబాద్‌లో మీడియాతో మాట్లాడుతూ, “ఇమ్రాన్ ఖాన్‌కి ఫైవ్ స్టార్ భోజన, వసతి సౌకర్యాలు అందిస్తున్నాము. కనుక అయన బయట కంటే జైల్లోనే దర్జాగా, సుఖంగా జీవిస్తున్నారు.
నిజానికి ఆయన బయట ఉంటేనే ప్రాణానికి ప్రమాదం ఉంటుంది. జైల్లో ఉన్నంత వరకు అయన ప్రాణానికి ఎటువంటి ప్రమాదం ఉండదు,” అని అన్నారు. అవినీతి ఆరోపణల కేసులో ఇమ్రాన్ ఖాన్ 2023 నుంచి జైల్లో ఉన్నారు.
