హాంగ్ కాంగ్‌లో భారీ అగ్ని ప్రమాదం... 44 మంది మృతి!
హాంగ్ కాంగ్ నగరంలో భారీ అగ్ని ప్రమాదం జరిగింది. ఈ ప్రమాదంలో 44 మంది చనిపోగా మరో 250 మంది ఆచూకీ తెలియవలసి ఉంది. నగరంలో నివాస సముదాయంలో స్థానిక కాలమానం ప్రకారం బుధవారం మధ్యాహ్నం 2.50 గంటలకు ఫైర్ అలారం మ్రోగింది.
వెంటనే అగ్నిమాపక సిబ్బంది అక్కడకు చేరుకొని మంటలు అదుపు చేసే ప్రయత్నం చేశారు. కానీ వరుసగా పక్క పక్కనే ఏడు అపార్ట్‌మెంట్లు ఉండటంతో మంటలు పక్క భవనాలకు కూడా వ్యాపించాయి. మంటలను ఆర్పేందుకు ఏకంగా 127అగ్నిమాపక వాహనాలను ఉపయోగించాల్సి వచ్చింది.
మధ్యాహ్నం నుంచి సుమారు 500 మందికి పైగా అగ్నిమాపక సిబ్బంది నిర్విరామంగా ప్రయత్నిస్తే నిన్న అర్దరాత్రికి మంటలు అదుపులోకి వచ్చాయి.
ఏడు అపార్ట్‌మెంట్లలో సుమారు 5,000 మంది నివసిస్తున్నారు. పోలీసులు, అగ్నిమాపక సిబ్బంది కలిసి వారందరినీ బయటకు తీసుకువచ్చి సురక్షిత ప్రాంతానికి తరలించారు. ఆ ఇళ్ళలో నివసిస్తున్న మరో 250 మంది ఆచూకీ ఇంకా తెలియాల్సి ఉంది. బహుశః వారు కూడా చనిపోయి ఉండవచ్చని భావిస్తున్నారు. ఈ ప్రమాదంలో అగ్నిమాపక శాఖకు చెందిన ఓ ఫైర్ మ్యాన్ కూడా మరణించాడు.
