దుబాయ్‌ ఎయిర్ షోలో కూలిన తేజస్
భారత్‌ అత్యంత ప్రతిష్టాత్మకంగా భావిస్తున్న స్వదేశీ తయారీ ‘తేజస్ యుద్ధ విమానం’ నేడు దుబాయ్‌ ఎయిర్ షోలో కూలిపోయింది. ఈ ప్రమాదంలో పైలట్ చనిపోయాడని వాయుసేన ధృవీకరించింది.
నింగిలో నుంచి శరవేగంగా నేలవైపు దూసుకువచ్చిన మళ్ళీ వెంటనే అదే వేగంతో నింగిలోకి దూసుకుపోయే ‘నెగటివ్ జీ ఫోర్స్ టర్న్’ విన్యాసం చేస్తున్నప్పుడు విమానం నేల కూలిపోయింది.
భూమికి చాలా చేరువగా వచ్చినప్పుడు కొన్ని సెకన్ల వ్యవధిలో విమానాన్ని మళ్ళీ పైకి తీసుకుపోవలసి ఉంటుంది. బహుశః పైలట్ ఈ విన్యాసం సరిగ్గా చేయలేకపోవడం లేదా విమానం వేగంగా గాల్లోకి లేచేందుకు తగిన శక్తిని ఇంజన్లు అందించలేకపోవడం వలన ఈ ప్రమాదం జరిగి ఉండవచ్చు.
తేలికపాటి తేజస్ యుద్ధ విమానాల శ్రేణిలో ఇది 4.5 వెర్షన్. పూర్తి దేశీయ సాంకేతిక పరిజ్ఞానంతో హిందూస్తాన్ ఏరో నాటిక్స్ లిమిటెడ్ వీటిని తయారు చేసింది.
ఈ ఏడాది మార్చిలో రాజస్థాన్‌లోని జైసల్మీర్‌లో తేజస్ యుద్ధ విమానం కూలిపోయింది. ఆ ప్రమాదంలో పైలట్ సురక్షితంగా బయటపడ్డాడు. కానీ నేడు జరిగిన ఈ ప్రమాదంలో పైలట్ చనిపోయాడు.
