అమెరికాలో మళ్ళీ తుపాకులు పేలాయి. ఈసారి మూడు వేర్వేరు ప్రాంతాలలో 11 మంది చనిపోయారు. శనివారం రాత్రి వాషింగ్టన్లోని లాంగ్ ఫెలో స్ట్రీట్లో గల బ్రైట్వుడ్ పార్క్ వద్ద ఓ వ్యక్తి విచక్షణారహితంగా కాల్పులు జరిపాడు. ఈ ఘటనలో ముగ్గురు వ్యక్తులు చనిపోగా మరో ముగ్గురు గాయపడ్డారు. కాల్పులు జరిపిన వ్యక్తి కారులో పరారి అయ్యాడు. పోలీసులు అతనికోసం గాలిస్తున్నారు.
ఇటువంటివే మరో రెండు ఘటనలు ఆదివారం జరిగాయి. ఫ్లోరిడాలోని లేక్ లాండ్ వద్ద నిన్న తెల్లవారుజామున ఓ వ్యక్తి జరిపిన కాల్పులలో ఓ బాలింత, ఆమె శిశువు, 11 ఏళ్ళ బాలిక, ఒక మహిళ చనిపోయారు. సమాచారం అందుకొన్న పోలీసులు హుటాహుటిన అక్కడకు చేరుకొని ఎదురుకాల్పులు జరిపి ఆ వ్యక్తిని బందించారు.
హ్యూస్టన్ నగరంలో ఆదివారం ఉదయం ఓ ఇంట్లో కుటుంబ సభ్యుల మద్య మొదలైన గొడవ కాల్పులు, చావులతో ముగిసింది. ఈ ఘటనలో 50-55 ఏళ్ళు వయసున్న ఇద్దరు పెద్దవాళ్ళు, 10-13 సం.లు వయసున్న ఇద్దరు పిల్లలు చనిపోయారు. కాల్పులు జరిగిన తరువాత ఇంట్లో మంటలు వ్యాపించి ఇల్లు తగులబడింది. దాంతో అగ్నిమాపకశాఖ వచ్చి మంటలు ఇరుగుపొరుగు ఇళ్ళకు వ్యాపించకుండా నివారించారు.
అమెరికాలో తుపాకుల వ్యాపారానికి వేలకోట్ల టర్నోవర్ ఉంటుంది. అందుకే ఈ గన్ కల్చర్ను నిషేదించడానికి ఏ ప్రభుత్వం ప్రయత్నించినా వారి బలమైన లాబీ అడ్డుపడుతుంటుంది. తుపాకి చేతిలో ఉంటే అది ఏదో ఓనాడు పేలకుండా ఉండదు కనుక ఏటా అమెరికాలో అనేకమంది వాటికి బలవుతూనే ఉన్నారు.