ట్విట్టర్‌లో మోడీని అన్‌ఫాలో చేసిన ట్రంప్‌
సోషల్ మీడియాలో మనకు నచ్చినవారిని ఫాలో అవుతూ వారికి సంబందించిన సమాచారం ఎప్పటికప్పుడు తెలుసుకొంటూ, అవసరమైతే మన అభిప్రాయాలు తెలియజేస్తుంటాము. అమెరికా అధ్యక్షుడు డోనాల్డ్ ట్రంప్‌ అధికారిక నివాస కార్యాలయం వైట్ హౌస్ , రాష్ట్రపతి రామ్‌నాథ్‌ కోవింద్‌, ప్రధాని నరేంద్రమోడీలతో సహా 19 మంది భారతీయ ప్రముఖులను ట్విట్టర్‌లో ఫాలో అవుతుండేది. కానీ ఇప్పుడు వారిరువురితో సహా మొత్తం 13 మంది భారతీయ ప్రముఖులను ట్విట్టర్‌లో అన్-ఫాలో చేసింది. అయితే ఏప్రిల్ 10న ప్రధాని నరేంద్రమోడీని ఫాలో అవడం మొదలుపెట్టి ఏప్రిల్ 29కే అన్-ఫాలో అవడం ఆశ్చర్యం కలిగిస్తుంది. దీనిపై వైట్ హౌస్ ఎటువంటి వివరణ ఈయలేదు కనుక ఎందుకు అన్-ఫాలో అయ్యిందో తెలియదు. దాంతో ప్రధాని నరేంద్రమోడీతో డోనాల్డ్ ట్రంప్‌ కటీఫ్ చెప్పేశారంటూ సోషల్ మీడియాలో ఊహాగానాలు మొదలైపోయాయి.
ఈ ఊహాగానాలపై వైట్ హౌస్ అధికారి స్పందిస్తూ, “సాధారణంగా అమెరికా అధ్యక్షుడు విదేశీ పర్యటనలు చేస్తున్నప్పుడు ఆయా దేశాధినేతలను వైట్ హౌస్ తాత్కాలికంగా సోషల్ మీడియాలో ఫాలో అవుతుంది. పర్యటన ముగిసిన కొన్ని రోజుల తరువాత ఆ అకౌంట్లను అన్-ఫాలో చేస్తుంటుంది. ఇది సర్వసాధారణంగా జరిగే ప్రక్రియే తప్ప ప్రత్యేక కారణాలు ఏమీ లేవు,” అని చెప్పారు.
