భోగాపురం నుంచి తొలి విమానం.. మరి వరంగల్‌ నుంచి ఎప్పుడు?

విశాఖపట్నం శివారులో భోగాపురం వద్ద అల్లూరి సీతారామరాజు అంతర్జాతీయ విమానాశ్రయం నిర్మాణ పనులు శరవేగంగా సాగుతున్నాయి.

డిసెంబర్‌ నెలలో తొలి విమానం ట్రయల్ రన్ జరుగబోతోందని మాజీ మంత్రి దేవినేని ఉమామహేశ్వర రావు ట్వీట్ చేశారు. 

ఏపీలో ఇప్పటికే 5 విమానాశ్రయాలున్నాయి. భోగాపురం విమానాశ్రయం అందుబాటులోకి వస్తే ఆరు అవుతాయి. ప్రకాశం జిల్లా ఒంగోలులో కూడా విమానాశ్రయం ఏర్పాటుకి ఓ ప్రైవేట్ ఏజన్సీ క్షేత్రస్థాయిలో సర్వే చేసి డీపీఆర్ సిద్దం చేస్తోంది. 

ఇవి కాక మరో అరడజను విమానాశ్రయాలు ఏర్పాటుకి నిశబ్దంగా సన్నాహాలు జరుగుతున్నాయి. టీడీపికి చెందిన రామ్మోహన్ నాయుడు కేంద్ర పౌరవిమానయన శాఖ మంత్రిగా ఉన్నందున ఆయన వ్యక్తిగతంగా శ్రద్ధ తీసుకొని ఏపీలో కొత్త విమానాశ్రయాల ఏర్పాటుకి చురుకుగా సన్నాహాలు చేస్తున్నారు. 

కనుక మరో 5-10 ఏళ్ళలో ఏపీలో కనీసం ఓ డజను విమానాశ్రయాలు ఏర్పాటు కావడం ఖాయంగానే కనిపిస్తోంది. 

ఈ నేపధ్యంలో ఏపీ కంటే అన్ని విధాలుగా అభివృద్ధి చెందిన మన తెలంగాణలో నేటికీ ఒకే ఒక్క శంషాబాద్ విమానాశ్రయంతోనే ఎందుకు సరిపెట్టుకోవలసి వస్తోంది?

వరంగల్‌, నిజామాబాద్‌, భద్రాద్రి కొత్తగూడెం తదితర జిల్లాలో విమానాశ్రయాల ప్రతిపాదనలు ఏమయ్యాయి? ఏ దశలో ఉన్నాయి? ఏపీలో మాదిరిగా తెలంగాణలో ఎందుకు పురోగతి జరగడం లేదు?

కనీసం వరంగల్‌ విమానాశ్రయ పనులైన ఎందుకు ప్రారంభం కావడం లేదు? అనే సందేహాలు కలుగక మానవు. 

ఇదివరకు కేసీఆర్‌ ముఖ్యమంత్రిగా ఉన్నప్పుడు నిత్యం ప్రధాని మోడీపై కత్తులు దూస్తూనే ఉన్నారు. అవమానిస్తూనే ఉన్నారు.

తెలంగాణ పట్ల వివక్ష చూపుతున్నందుకే ఈ కొట్లాట అని సమర్ధించుకున్నప్పటికీ, అది అయన స్వీయ రాజకీయ అవసరాలు, బీఆర్ఎస్‌ పార్టీ రాజకీయ ప్రయోజనాల కోసమే అని చెప్పక తప్పదు. 

తెలంగాణ బీజేపికి బండి సంజయ్‌ అధ్యక్షుడుగా ఉన్నప్పుడు ఆయన కేసీఆర్‌ ప్రభుత్వానికి పెను సవాలుగా, ముప్పుగా మారారు. కానీ అయన తన స్థాయికి తగినవారు కాదని కేసీఆర్‌ మోడీతో పెట్టుకున్నారు. 

తద్వారా తనని తను జాతీయ నాయకుడుగా ప్రమోట్ చేసుకోవాలనుకున్నారు. కానీ కేంద్రంతో కేసీఆర్‌ వైరం వలన తెలంగాణకు అన్యాయం జరిగింది. దానినే ఆయన వివక్ష అని సర్ది చెప్పుకొని అందుకు కేంద్రాన్ని నిందిస్తూ కాలక్షేపం చేశారు. 

కేసీఆర్‌ తర్వాత కాంగ్రెస్‌ అధికారంలోకి వచ్చింది. సిఎం రేవంత్ రెడ్డి కేసీఆర్‌లా ప్రధాని మోడీపై కత్తులు దూయడం లేదు. చాలా సఖ్యతగా, వినయంగా ఉంటూ రాష్ట్రానికి రావాల్సినవి సాధించుకునేందుకు ప్రయత్నిస్తూనే ఉన్నారు. 

కానీ జాతీయ స్థాయిలో కాంగ్రెస్‌ పార్టీ బీజేపిని, ప్రధాని మోడీతో యుద్ధాలు చేస్తూనే ఉంది. రాహుల్ గాంధీ ప్రధాని మోడీని నిందించని రోజు లేదంటే అతిశయోక్తి కాదు. 

ప్రధాని మోడీ కూడా మనిషే. కనుక ఆ విమర్శలు పట్టించుకోకుండా తెలంగాణకు ఉదారంగా తోడ్పడతారని అనుకోవడం అత్యాశే అవుతుంది కదా? 

కనుక ఓసారి కేసీఆర్‌ కత్తులు దూయడం వలన, మరోసారి కాంగ్రెస్‌-బీజేపిల మద్య శత్రుత్వం కారణంగా తెలంగాణకు నష్టం జరుగుతోందని చెప్పక తప్పదు. లేకుంటే వరంగల్‌ నుంచి ఈపాటికి విమానాలు ఎగురుతుండేవే కదా?