సచివాలయంలో కాంగ్రెస్‌ బొమ్మలు తీసేస్తాం: కేటీఆర్‌
5.png "సచివాలయంలో కాంగ్రెస్‌ బొమ్మలు తీసేస్తాం: కేటీఆర్‌")
నిన్న దీక్షా దివస్ సందర్భంగా బీఆర్ఎస్‌ వర్కింగ్ ప్రెసిడెంట్‌ కేటీఆర్‌ తెలంగాణ భవన్‌లో పార్టీ నేతలు, కార్యకర్తలను ఉద్దేశ్యించి మాట్లాడుతూ, “మన తెలంగాణ తల్లి చేతిలో బతుకమ్మని మాయం చేసింది ఈ కాంగ్రెస్‌ సర్కార్. తెలంగాణ తల్లి విగ్రహం స్థానంలో కాంగ్రెస్‌ బొమ్మని పెట్టింది. సచివాలయం ఎదుట రాజీవ్ గాంధీ విగ్రహం ఏర్పాటు చేసిందీ కాంగ్రెస్‌ సర్కార్.
సిఎం రేవంత్ రెడ్డి, కాంగ్రెస్‌ నేతలు వారి అధిష్టానానికి గులాములుగా మారితే ఎవరికీ అభ్యంతరం లేదు. కానీ తెలంగాణ ప్రజల ఆత్మగౌరవాన్ని దెబ్బ తీస్తుంటే సహించేది లేదు. తెలంగాణ ఉద్యమాల సాక్షిగా తప్పకుండా బీఆర్ఎస్‌ పార్టీ మళ్ళీ అధికారంలోకి వస్తుంది. వచ్చిన వెంటనే సచివాలయంలో ఈ కాంగ్రెస్‌ బొమ్మలు తీసేసి తెలంగాణ తల్లి విగ్రహం పెడతాము,” అని కేటీఆర్‌ అన్నారు.
ఇలా ప్రభుత్వం మారినప్పుడల్లా తెలంగాణ తల్లి విగ్రహాలు కూడా మార్చుకుంటూ కాంగ్రెస్‌, బీఆర్ఎస్‌ పార్టీలు రెండూ ప్రజల మనోభావాలు దెబ్బ తీస్తున్నాయని చెప్పక తప్పదు. రాష్ట్ర విభజనతో తెలంగాణ ప్రత్యేక రాష్ట్రంగా ఏర్పడింది కనుక తెలుగు తల్లి స్థానంలో తెలంగాణ తల్లి ఏర్పాటు చేసుకోవడం మంచి ఆలోచనే. కానీ తెలంగాణ తల్లి విగ్రహం విషయంలో కూడా పార్టీల మద్య ఏకాభిప్రాయం లేకపోవడం కాంగ్రెస్‌ తల్లి, బీఆర్ఎస్‌ తల్లి అంటూ వాదించుకుంటుండటం చాలా బాధాకరం.
