ఫ్యామిలీ మ్యాన్-3 వచ్చేస్తున్నాడు!
October 28, 2025
ఓటీటీలలో వచ్చే కొన్ని వెబ్‌ సిరీస్‌లో భాషతో సంబంధం లేకుండా ప్రేక్షకుల ఆదరణ పొంది సూపర్ హిట్ అవుతుంటాయి. అటువంటిదే అమెజాన్ ప్రైమ్‌ టీవీలో వచ్చిన ఫ్యామిలీ మ్యాన్-1,2. రాజ్, డికె దర్శకత్వంలో వచ్చిన ఈ స్పై, యాక్షన్, థ్రిల్లర్ వెబ్‌ సిరీస్‌ తెలుగుతో సహా చాలా భాషలలో విడుదల చేశారు. అన్ని భాషలలో ప్రజల ప్రశంశలు అందుకుంది. కనుక ఫ్యామిలీ మ్యాన్-3 కోసం ప్రజలు చాలా కాలంగా ఎదురుచూస్తున్నారు. వారి నిరీక్షణకు తెర దించుతూ నవంబర్‌ 21న విడుదల కాబోతోందని అమెజాన్ ప్రైమ్‌ టీవీ ప్రకటించింది.
ప్రముఖ బాలీవుడ్ నటుడు మనోజ్‌ బాజ్‌పేయి, ప్రియమణి ఇద్దరు పిల్లలు కలిగిన దంపతులుగా నటిస్తున్న సంగతి తెలిసిందే. దేశాన్ని కాపాడేందుకు థ్రెట్ అనాలసిస్ అండ్ సర్వైవలెన్స్ సెల్‌ అధికారిగా ఉగ్రవాదులను కనిపెట్టి మట్టుబెట్టే ఆపరేషన్స్ లో శ్రీకాంత్ తివారి (మనోజ్‌ బాజ్‌పేయి) పాల్గొంటూ ఉంటారు. కానీ ఈ విషయం ఇంట్లో వారికి తెలియనీయకుండా ఓ సాధారణ మధ్య తరగతి గృహస్తుగా జీవిస్తుంటాడు.
కనుక ఎదుగూ బొదుగూ లేని జీతం, ఉద్యోగం చేస్తున్నాడని భార్య, పిల్లలు చిరుబురులాడుతుంటే అతను వారిని మేనేజ్ చేయడానికి పడే తిప్పలు చాలా సరదా సరదాగా సాగుతుంటాయి. అందుకే ఈ వెబ్‌ సిరీస్‌కి ఫ్యామిలీ మ్యాన్ టైటిల్‌ అని పెట్టారు. సీజన్-2లో సమంత శ్రీలంక ఎల్‌టీఈ ఉగ్రవాదిగా అద్భుతంగా నటించి సిరీస్‌ని రక్తి కట్టించారు.
ఇప్పుడు సీజన్-3లో మనోజ్‌ బాజ్‌పేయి, ప్రియమణి, షరీఫ్ హష్మీ, అశ్లేష్ ఠాకూర్, శరద్ ఖేల్ఖర్, సందీప్ కిషన్, గుల్ పనాగ్, శ్రేయ ధన్వంతరీ, సన్నీ హిందూజా, అభయ్ వర్మ నటించారు.
