విశ్వక్‌ సేన్‌ ఫంకీ టీజర్‌ రేపే విడుదల
October 09, 2025
విశ్వక్‌ సేన్‌ తొలిసారిగా స్త్రీ వేషం వేసిన ‘లైలా’ రిలీజ్‌కి ముందే అనేక వివాదాలలో చిక్కుకొని, రిలీజ్ కాగానే తొలిరోజే నెగెటివ్ టాక్ తెచ్చుకొని బోర్లా పడింది.
దాని తర్వాత సూపర్ హిట్ మూవీ ‘జాతి రత్నాలు’ దర్శకుడు అనుదీప్ దర్శకత్వంలో ‘ఫంకీ’ సినిమా మొదలుపెట్టి దాదాపు పూర్తి చేశారు.
ఈ సినిమాలో మొదట ఆషికా రంగనాద్‌ని హీరోయిన్‌గా అనుకున్నప్పటికీ తర్వాత కాయడు లోహర్‌ని తీసుకున్నారు. ‘రిటర్న్ ఆఫ్ ది డ్రాగన్’ సినిమాలో తన అందచందాలు, నటనతో ప్రేక్షకులను మెప్పించి దర్శకుడు అనుదీప్ దృష్టిలో పడింది. ఇదో మంచి ‘ఫన్ అండ్ ఫ్యామిలీ ఎంటర్టెయినర్’ అని అనుదీప్ ముందే చెప్పేశాడు.
ఈ సినిమాలో విశ్వక్‌ సేన్‌ ఓ సినీ దర్శకుడుగా నటించగా, హీరోయిన్‌ ఆ సినీ నిర్మాతగా నటించినట్లు తెలుస్తోంది. కనుక నిర్మాత, దర్శకుడు జోడీ ప్రేమలో పడితే కామెడీకి, రోమాన్స్ కి కొరతే ఉండదు.
ఈ సినిమాకు కధ, దర్శకత్వం: అనుదీప్, సంగీతం: భీమ్స్ సీసీరిలియో, కెమెరా: సురేష్ సంగం, ఎడిటింగ్: నవీన్ నూలి చేస్తున్నారు.
శ్రీకర స్టూడియోస్ సమర్పణలో సితారా ఎంటర్‌టైన్‌మెంట్స్‌, ఫార్చ్యూన్ ఫోర్ సినిమాస్ బ్యానర్లపై నాగవంశీ ఈ సినిమా నిర్మిస్తున్నారు.
