మీనాక్షి అవుట్ సందీప్ ఇన్‌..ఛార్జ్‌: తెలంగాణ కాంగ్రెస్
తెలంగాణ కాంగ్రెస్ వ్యవహారాల ఇన్‌ఛార్జ్‌ మీనాక్షి నటరాజన్ స్థానంలో బి.ఎం.సందీప్‌ను కాంగ్రెస్ అధిష్టానం ఇన్‌ఛార్జ్‌గా నియమించింది. ఈ నియామకం తక్షణమే అమల్లోకి వస్తుందని ఏఐసీసీ ప్రధాన కార్యదర్శి (సంస్థాగత వ్యవహారాలు) కేసీ వేణుగోపాల్ అధికారిక ప్రకటన విడుదల చేశారు.
తెలంగాణ కాంగ్రెస్‌లో నాయకుల మద్య అంతర్గత విభేదాలు, సమన్వయ సమస్యలు పరిష్కరించి పార్టీని గాడిన పెట్టడంలో ఆమె విఫలమైనందున ఈ మార్పు చోటు చేసుకుని ఉండవచ్చు. ఆమె స్థానంలో వస్తున్న బి.ఎం.సందీప్ అయినా తెలంగాణ కాంగ్రెస్ నేతలను గాడిన పెట్టగలరో లేదో చూడాలి. ఆమెను ఈ పదవి నుంచి తొలగించినప్పటికీ ఇంతకాలం తెలంగాణలో కాంగ్రెస్ పార్టీ వ్యవహారాలను సమర్ధంగా పర్యవేక్షించినందుకు కాంగ్రెస్ అధిష్ఠానం ఆమె సేవలను ప్రశంసించింది.
బి.ఎం.సందీప్ గతంలో మహారాష్ట్ర, గుజరాత్ రాష్ట్రాల ఏఐసీసీ కార్యదర్శిగా పనిచేశారు. పంచాయతీరాజ్ & యువజన కాంగ్రెస్: రాజీవ్ గాంధీ పంచాయతీరాజ్ సంఘటన్ జాతీయ కన్వీనర్‌గా, కర్ణాటక రాష్ట్ర ఛైర్మన్‌గా, ఇండియన్ యూత్ కాంగ్రెస్ రిటర్నింగ్ ఆఫీసర్‌గా కీలక బాధ్యతలు నిర్వహించారు.
క్షేత్రస్థాయిలో పార్టీని బలోపేతం చేయడం, గిరిజన సంక్షేమ కార్యక్రమాలను ప్రజలలోకి తీసుకువెళ్ళడంలో ఆయనకు ప్రత్యేక గుర్తింపు ఉంది.
