హైదరాబాద్‌ కేబీఆర్ పార్క్ వద్ద మల్టీ లెవెల్ కార్ పార్కింగ్
హైదరాబాద్‌లో మొట్ట మొదటిసారిగా కేబీఆర్ పార్క్ వద్ద మల్టీ లెవెల్ కార్ పార్కింగ్ వ్యవస్థ శనివారం ప్రారంభం అయ్యింది.
నిత్యం రద్దీగా ఉండే ఆ ప్రాంతంలో కార్లు పార్క్ చేసుకోవడానికి వెసులుబాటు లేకపోవడం అందరూ రోడ్ల పక్కనే పార్క్ చేస్తుంటారు. అందువల్ల అక్కడ ట్రాఫిక్ సమస్యలు ఏర్పడుతున్నాయి. వాటికి పరిష్కారంగా జీహెచ్ఎంసీ ఈ మల్టీ లెవెల్ కార్ పార్కింగ్ వ్యవస్థని ఏర్పాటు చేసి ప్రజలకు అందుబాటులోకి తెచ్చింది.
జీహెచ్ఎంసీ అధ్వర్యంలో నవంబర్‌ నిర్మాణ్ అనే సంస్థ దీనిని ఏర్పాటు చేసింది. ఒక్కో యూనిట్‌లో ఆరు అంతస్తులతో మొత్తం 72 కార్లు పార్కింగ్ చేసుకునేందుకు వీలుగా ఈ పూర్తి ఆటోమేటిక్ మల్టీ లెవెల్ కార్ పార్కింగ్ వ్యవస్థని ఏర్పాటు చేసింది. ఈ రెండు సంస్థలు కలిసి దీనిని పీపీపీ పద్దతిలో నిర్వహిస్తాయి.
దీనిలో రెండు గంటలకు రూ.30 చొప్పున ఫీజుగా నిర్ణయించారు. ఇది ప్రతీరోజూ ఉదయం 5 గంటల నుంచి రాత్రి 11 గంటల వరకు అందుబాటులో ఉంటుంది.
దీనిలో పూర్తి ఆటోమేటిక్, మాన్యువల్ రెండు అందుబాటులో ఉన్నాయి. కనుక కారు యజమానులు ప్రీ-పెయిడ్ కార్డులు కొనుగోలు చేసి స్వయంగా దీనిని ఉపయోగించుకోవచ్చు. అక్కడ సిబ్బంది సాయంతో తమ కార్లను పార్క్ చేసుకోవచ్చు.
దీనిలో లోడ్ బ్యాలన్స్, సెన్సర్స్, కియోస్కీ వంటి అత్యాధునిక పరికరాలు అమర్చారు. పార్కింగ్ వ్యవస్థ లోపల బయట సీసీ కెమెరాలు, సెక్యూరిటీ సిబ్బంది, అగ్నిమాపక వ్యవస్థ వగైరాలన్నీ ఏర్పాటు చేశారు.
ఈ ప్రయోగం విజయవంతం అయితే నగరంలో రద్దీగా ఉండే ప్రాంతాలలో ఇటువంటి మల్టీ లెవెల్ కార్ పార్కింగ్ వ్యవస్థలను ఏర్పాటు చేయాలని జీహెచ్ఎంసీ భావిస్తోంది.
