హైదరాబాద్‌లోనూ ఉపగ్రహాల తయారీ.. ప్రయోగాలు!
భారత్‌లో ఉపగ్రహాలు, వాటిని అంతరిక్షంలోకి ప్రవేశపెట్టే వాహక నౌకలను ఇంతకాలం భారత్‌ అంతరిక్షం పరిశోధన సంస్థ మాత్రమే తయారు చేస్తోంది. ఏపీలో శ్రీహరికోట అంతరిక్ష కేంద్రం నుంచి వాటిని ప్రయోగిస్తోంది. కానీ ఇప్పుడు దేశంలో తొలిసారిగా ప్రైవేట్ రంగంలో అదీ... మన హైదరాబాద్‌లోనే ‘స్కైరూట్’ కంపెనీ తయారుచేస్తోంది.
ఇటీవలే ప్రధాని మోడీ స్కైరూట్ తయారు చేసిన విక్రమ్‌-1 అంతరిక్ష వాహకనౌకని ఢిల్లీ నుంచి వర్చువల్‌గా ప్రారంభించారు. ఈ సందర్భంగా ప్రధాని మోడీ మాట్లాడుతూ, అంతరిక్ష రంగంలో మొత్తం 300 స్టార్టప్ కంపెనీలు ఏర్పాటు కాబోతున్నాయని తెలిపారు. ప్రైవేట్ రంగంలో ఏర్పాటవుతున్న ఈ స్టార్టప్ కంపెనీలలో మొట్టమొదట స్కైరూట్ విక్రమ్‌-1 అంతరిక్ష వాహకనౌకని తయారుచేయడం చాలా అభినందనీయమని అన్నారు.
హైదరాబాద్‌లోని శంషాబాద్ మండలంలో ఇమరాత్, కంచ హార్డ్ వేర్ పార్కులో 2 లక్షల చ.అడుగుల విస్తీర్ణంలో స్కైరూట్ సంస్థ ఏర్పాటు అయ్యింది. దీనిలో ఉపగ్రహాలు, వాటి వాహక నౌకల పరిశోధన, తయారీ, పరీక్షా కేంద్రం ఉన్నాయి. నెలకు ఒక ఉపగ్రహ వాహక నౌక తయారు చేయగల సామర్ధ్యంతో దీనిని నెలకొల్పారు.
గతంలో ఇస్రోలో శాస్త్రవేత్తలుగా పనిచేసిన డా.పవన్ చందా, నాగ భరత్ కలిసి 2018లో దీని ఏర్పాటుకి పూనుకున్నారు. స్కైరూట్ సంస్థలో ఇప్పటికే అత్యంత నైపుణ్యం కలిగిన 1,000 మంది ఇంజనీర్లు, శాస్త్రవేత్తలు పనిచేస్తున్నారు. మరో వెయ్యి కోట్లు పెట్టుబడితో త్వరలో శాటిలైట్ లాంచింగ్ స్టేషన్‌ కూడా ఏర్పటు చేయబోతున్నామని డా.పవన్ చందా తెలిపారు.
ఇది సిద్దమైతే భారత్‌తో సహా ప్రపంచ దేశాలకు చెందిన ఉపగ్రహాలను స్కైరూట్ ద్వారా అంతరిక్షంలోకి ప్రవేశపెట్టవచ్చని తెలిపారు. తమ సంస్థ తయారుచేసిన విక్రమ్‌-1 మరో రెండు నెలలో లాంచింగ్ చేస్తామని చెప్పారు.
