రుక్మిణీ వసంత్ కూడా చాలా ‘టాక్సిక్’
January 06, 2026
మలయాళ దర్శకురాలు గీతూ మోహన్ దాస్ దర్శకత్వంలో నయనతార ప్రధాన పాత్రలో ‘టాక్సిక్’ (సబ్ టైటిల్: ఏ ఫెయిరీ టేల్ ఫర్ గ్రోనప్స్) సినిమాలో నటిస్తున్న ఒక్కో హీరోయిన్ ఫస్ట్ లుక్ పోస్టర్ విడుదల చేస్తున్నారు. వారి పోస్టర్స్ చూస్తే నిజంగానే చాలా టాక్సిక్ అనిపిస్తుంది.
ఈ సినిమాలో నయనతార పాత్ర పేరు గంగ. కానీ మనిషి మాత్రం చాలా టాక్సిక్ అని ఫస్ట్ లుక్ పోస్టర్తో చెప్పేశారు. మోడ్రన్ డ్రెస్సులో తుపాకీ చేత్తో పట్టుకొని ఓ క్యాసినోలోకి వెళుతున్న ఫోటోని ఫస్ట్ లుక్ పోస్టర్గా విడుదల చేశారు.
తర్వాత పోస్టర్ తారా సుతారియాది కూడా అలాగే ఉంది. ఈ సినిమాలో రెబెక్కాగా నటిస్తున్న ఆమె కూడా మోడ్రన్ డ్రస్ వేసుకొని చేతిలో తుపాకీతో ఎవరికో గురిపెట్టినట్లు ఫస్ట్ లుక్ పోస్టర్లో చూపారు.
తాజాగా మరో హీరోయిన్ రుక్మిణీ వసంత్ ఫస్ట్ లుక్ పోస్టర్ విడుదల చేశారు. ఆమె కూడా మోడ్రన్ దుస్తులలో చాలా టాక్సిక్గానే ఉంది.
వీరు ముగ్గురూ కాక ఈ సినిమాలో నదియాగా కియరా అద్వానీ, ఎలిజబెత్గా హ్యూమా ఖురేషీ నటిస్తున్నారు. ప్రముఖ కన్నడ నటుడు యష్ ఈ సినిమాలో కీలకపాత్ర చేస్తున్నారు.
ఈ సినిమాకు కధ, దర్శకత్వం: గీతు మోహన్ దాస్, సంగీతం: రవి బస్రూర్, కెమెరా: రాజీవ్ రవి, స్టంట్స్: జేజే పెర్రీ (హాలీవుడ్), ఎడిటింగ్: ఉజ్వల్ కులకర్ణి చేస్తున్నారు.
కెవిఎన్ ప్రొడక్షన్స్, మాన్స్టర్ మైండ్ క్రియేషన్స్ బ్యానర్లపై వెంకట్ కే నారాయణతో కలిసి యష్ నిర్మిస్తున్నారు. ఈ సినిమాని కన్నడ, ఇంగ్లీష్ భాషల్లో ఒకేసారి నిర్మించి తెలుగు, తమిళ్, మలయాళ భాషల్లో డబ్ చేసి మార్చి 19న విడుదల చేయబోతున్నారు.
