మిరాయ్: వైబ్ ఉంది కానీ చిరు స్టెప్స్ దేనికి?
July 26, 2025
ఘట్టమనేని కార్తీక్ దర్శకత్వంలో తేజ సజ్జా హీరోగా తెరకెక్కుతున్న ‘మిరాయ్’ నుంచి ‘వైబ్ ఉందిలే...’ అంటూ సాగే లిరికల్ వీడియో సాంగ్ కొద్ది సేపటి క్రితం విడుదల చేశారు. కృష్ణ కాంత్ వ్రాసిన ఈ పాటకి గౌర హరి సంగీతం అందించగా అర్మాన్ మాలిక్ పాడారు.
సూపర్ హిట్ సినిమా ‘హనుమాన్’ తర్వాత వస్తున్నసూపర్ యోధ ‘మిరాయ్’ పై చాలా భారీ అంచనాలను ఈ ఒక్క పాట తారుమారు చేసేలా ఉంది.
పాట సంగీతం, కోరియోగ్రఫీ రెండూ పాత సినిమాలను గుర్తుచేస్తాయి. తేజా సజ్జ వంటి యువ నటుడికి అటువంటి స్లో-పేస్ కోరియోగ్రఫీ చేయడం, అదీ.... కొన్ని స్టెప్స్ మెగాస్టార్ చిరంజీవి స్టెప్స్ పోలి ఉండటం ఆశ్చర్యం కలిగిస్తుంది.
ఈ సినిమాలో తేజ సజ్జకు జోడీగా రీతికా నాయక్ నటిస్తుండగా మంచు మనోజ్ దుష్టశక్తుల నాయకుడుగా నటిస్తున్నాడు. జగపతిబాబు, శ్రీయ శరణ్, జయరాం, రాజేంద్రనాధ్ జుట్శీ, పవన్ చోప్రా, తాంజ కెల్లర్ తదితరులు ముఖ్య పాత్రలు చేస్తున్నారు.
ప్రపంచాన్ని నాశనం చేసేందుకు ప్రయత్నిస్తున్న ఓ దుష్టశక్తిని ‘మిరాయ్’ అనే అతీతశక్తులు కలిగిన ఓ ఆయుధంతో ‘సూపర్ యోధ’ ఏవిదంగా అడ్డుకుంటాడనేది ఈ సినిమా కధ.
ఈ సినిమాకి దర్శకత్వం, కెమెరా: కార్తీక్ ఘట్టమనేని, సంగీతం: గౌర హరి, ఆర్ట్: శ్రీ నాగేంద్ర తంగెల చేస్తున్నారు.
మిరాయ్ సినిమాని సుమారు రూ.200 కోట్ల బడ్జెట్‌తో పీపుల్ మీడియా ఫ్యాక్టరీ బ్యానర్‌పై టీజీ విశ్వప్రసాద్ నిర్మిస్తున్నారు. దీనిని తెలుగు, తమిళ్, కన్నడం మలయాళం, బెంగాలీ, మరాఠీ, చైనీస్ భాషల్లో 2డి, 3డి ఫార్మాట్‌లో నిర్మిస్తున్న మిరాయ్ ఈ ఏడాది సెప్టెంబర్‌ 5న విడుదల కాబోతోంది.
