చంద్రయాన్.. కౌంట్ డౌన్ రీస్టార్ట్!
October 22, 2026
ఇది భారత్‌ అంతరిక్ష సంస్థ (ఇస్రో) చేస్తున్న ‘చంద్రయాన్’ ప్రయోగం గురించి కాదు. నిర్మాతగా మారిన దర్శకుడు వేణు ఊడుగుల తీస్తున్న ‘చంద్రయాన్’ సినిమా గురించి.
‘నీది నాదీ ఒకే కథ’, ‘విరాట పర్వం’ సినిమాలతో దర్శకుడిగా తనకంటూ ప్రత్యేక గుర్తింపు తెచ్చుకున్న వేణు ఊడుగుల, ‘రాజు వెడ్స్ రాంబాయి’ సినిమాతో నిర్మాతగా మారి తొలి సినిమాతోనే విజయం అందుకున్నారు.
ఇప్పుడు ఆయన సమర్పణలో ‘చంద్రయాన్’ అనే గ్రామీణ కామెడీ సినిమా తెరకెక్కుతోంది. బాధ్యత లేకుండా అల్లరి చిల్లరిగా తిరిగే ముగ్గురు పల్లెటూరి ముగ్గురు యువకులు, తమ సత్తా నిరూపించుకోవాలనుకుంటారు. అందుకు రాకెట్ తయారు చేసి చంద్రుడిపైకి వెళ్ళాలనుకుంటారు. అదే ఈ చంద్రయాన్!
ఈ సినిమా ట్రైలర్‌ లాంచ్ ఈవెంట్ ముహూర్తం ఖరారు చేశారు. కానీ చివరి నిమిషంలో వాయిదా పడిందని తెలియజేస్తూ, “ప్రయాణానికి ముందు ఒక ఊహించని మలుపు. చంద్రయాన్ ట్రైలర్‌ లాంచ్ ప్రణాళికలలో అనుకోని మార్పులు చోటుచేసుకున్నాయి. కానీ అసలు సందడి ఇంకా ముగియలేదు! కొత్త కౌంట్ డౌన్ మొదలైంది. మరిన్ని అప్‌డేట్స్ కోసం వేచి ఉండండి!,” అని చిత్ర బృందం ప్రకటించింది.
శ్రీనాథ్ చంద్రశేఖర్ దర్శకత్వం చేస్తున్న ఈ సినిమాలో శివకుమార్ ధీకొండ, స్వప్న ప్రియదర్శిని, రవి శివతేజ, వంశీధర్, లోకేష్, బలగం సత్యనారాయణ కీలక పాత్రల్లో నటిస్తున్నారు.
చంద్రయాన్ కథ, స్క్రీన్‌ప్లే, సంభాషణలు, దర్శకత్వం: శ్రీనాథ్ చంద్రశేఖర్, సినిమాకు సంగీతం: హర్ష ప్రవీణ్, సినిమాటోగ్రఫీ: శ్రీనివాస్ బి, ఎడిటింగ్: పి.ఆర్. తేజ దాసరి చేశారు.
వేణు ఊడుగుల సమర్పణలో సింబా స్క్రీన్ స్టోరీస్ పతాకంపై ప్రవీణ్ మొలక నిర్మిస్తున్న ఈ సినిమా అక్టోబర్ 30న విడుదల కావాల్సి ఉంది. కానీ ఈ ప్రయోగం కూడా వాయిదా పడినట్లు తెలుస్తోంది.
