మోడీ,అమిత్ షాలకు కేటీఆర్ సూటి ప్రశ్న
బీఆర్ఎస్‌ పార్టీ వర్కింగ్ ప్రెసిడెంట్ కేటీఆర్ తరచూ తెలంగాణ సిఎం రేవంత్‌ రెడ్డిని పలు అంశాలపై సూటిగా ప్రశ్నిస్తూనే ఉంటారు. విమర్శిస్తూనే ఉంటారు. బహుశః వాటికి కాంగ్రెస్‌ నేతలు కూడా అలవాటు పడిపోయారేమో వాటిని పెద్దగ పట్టించుకోరు . ఇప్పుడు కేటీఆర్ నేరుగా ప్రధాని మోడీ, కేంద్ర హోంమంత్రి అమిత్ షాలనే సూటిగా ఓ ప్రశ్న అడిగారు.
ఇటీవల అమిత్ షా హైదరాబాద్‌లో జరిగిన బిజేపి పాదయాత్రలో పాల్గొన్నప్పుడు మాట్లాడుతూ, “ఈ కాంగ్రెస్‌ ప్రభుత్వం తెలంగాణ రాష్ట్రాన్ని ఏటీఎంగా మార్చేసుకొని డబ్బు దండుకుంటోంది. అలా దండుకున్న డబ్బు మూటలను ఈ సీఎం ఢిల్లీలో తమ అధిష్టానానికి సమర్పించుకుంటూ తన పదవి కాపాడుకుంటున్నారు.
కాంగ్రెస్‌, బీఆర్ఎస్‌ రెండు పార్టీలో తెలంగాణను దోచుకుతిన్నాయి. వచ్చే ఎన్నికలలో ఈ రెండు పార్టీలను కూకటివేళ్ళతో పెకలించి వేస్తాం. వాటి నుంచి తెలంగాణ రాష్ట్రానికి, ప్రజలకు విముక్తి కల్పిస్తాం. బిజేపి మాత్రమే నిజాయితీగా పనిచేస్తుంది. తెలంగాణ రాష్ట్రాన్ని అభివృద్ధి చేయగల శక్తి, నిబద్దత ఒక్క బిజేపికి మాత్రమే ఉంది,” అని అమిత్ షా అన్నారు.
ఈ వ్యాఖ్యలపై కేటీఆర్ స్పందిస్తూ, “ఈ రాష్ట్రాన్ని కాంగ్రెస్‌ ప్రభుత్వం దోచుకుంటోందని, తెలంగాణ ప్రజల సొమ్ముని సిఎం రేవంత్‌ రెడ్డి తన అధిష్టానానికి సమర్పించుకుంటున్నాడని ప్రధాని మోడీ, అమిత్ షాలు స్వయంగా చెపుతున్నప్పుడు, మరి ఎందుకు చర్యలు తీసుకోవడం లేదు? కాంగ్రెస్‌-బిజేపిల మధ్య రహస్య అవగాహన ఉన్నందునేనా?లేకుంటే చర్యలు తీసుకోవాలి కదా?” అని సూటిగా ప్రశ్నించారు.
