జొమాటో బాదుడు.. క్యాష్ ఆన్ డెలివరీకి అదనపు ఛార్జ్ షీట్?
ఆన్లైన్లో ఫుడ్ ఆర్డర్ చేసే వినియోగదారులపై జొమాటో మరో భారం మోపింది. క్యాష్ ఆన్ డెలివరీ ద్వారా ఆర్డర్ చేసే వారి నుంచి అదనంగా రూ.5 చొప్పున ఛార్జీ వసూలు చేస్తున్నట్లు సమాచారం. కానీ ఈ అదనపు ఛార్జీ అందరికీ ఒకే విధంగా ఉండకపోవచ్చని, ఆర్డర్ విలువ, రవాణా సమయం, దూరాన్ని బట్టి మారే అవకాశం ఉందని సమాచారం.
ఇప్పటికే జొమాటో ఈ ఏడాది మార్చిలో ప్లాట్ఫామ్ ఫీజును పెంచింది. గతంలో ఒక్కో ఆర్డర్పై రూ.12.50గా ఉన్న ప్లాట్ఫామ్ ఫీజును రూ.14.90కి పెంచింది. అంటే ఒక్కో ఆర్డర్పై రూ.2.40 అదనంగా చెల్లించాల్సి వస్తోంది. ఈ పెంపు సుమారు 19.2 శాతంగా ఉంది. జీఎస్టీతో ఈ ప్లాట్ఫామ్ ఫీజు మరింత పెరుగుతుంది.
డిజిటల్ పేమెంట్లను ప్రోత్సహించడంలో భాగంగానే ఈ నిర్ణయం తీసుకున్నట్లు సంస్థ చెపుతున్నప్పటికీ, నానాటికీ పెరుగుతున్న నిర్వహణ ఖర్చులు, ఆదాయం స్థిరీకరణ చేసుకొని లాభాలు పెంచుకునేందుకు ఈ అదనపు వడ్డింపు అని సమాచారం.
జోమోటో బాటలోనే మిగిలిన కంపెనీలు నడుస్తూ త్వరలో డెలివరీ చార్జీలు పెంచక మానవు. కనుక ఆన్లైన్లో ఫుడ్ ఆర్డర్ చేసి తెప్పించుకునేవారిపై ఈ అదనపు భారం పడుతుంది. ఇది ఇక్కడితో ఆగదు కనుక క్రమంగా పెరుగుతుంది.
