ఆన్‌లైన్‌ నగదు బదిలీలపై ఇక ఛార్జీలు ఉండవు
June 06, 2019
సాధారణంగా నిఫ్ట్ లేదా ఆర్టీజీఎస్ ద్వారా ఆన్‌లైన్‌లో నగదు బదిలీలు, లావాదేవీలు చేసినప్పుడు అన్ని బ్యాంకులు ఆ కొంత రుసుము వసూలు చేస్తుంటాయి. దేశంలో నగదురహిత లావాదేవీలను ప్రోత్సహించాలనే ఉద్దేశ్యంతో రిజర్వ్ బ్యాంక్ ఆఫ్ ఇండియా ఇక నుంచి ఆ చార్జీలను రద్దు చేస్తున్నట్లు నేడు ప్రకటించింది. కనుక దేశంలో అన్ని బ్యాంకులు ఈ ప్రయోజనాన్ని తమ ఖాతాదారులకు వర్తింపజేయాలని రిజర్వ్ బ్యాంక్ కోరింది. దీనికి సంబందించి మార్గదర్శకాలను వారం రోజులలోపుగా బ్యాంకులకు తెలియజేస్తామని తెలిపింది. ప్రస్తుతం ఏటీఎం లావాదేవీలపై వసూలు చేస్తున్న ఛార్జీలను కూడా పరిశీలించి సవరించేందుకు ఒక కమిటీని ఏర్పాటు చేయబోతున్నట్లు ఆర్బీఐ తెలిపింది.
