వచ్చే వారం నుంచి హరిహర వీరమల్లు ఆఖరి షెడ్యూల్ షురూ
November 29, 2024
పవన్ కళ్యాణ్‌ కధానాయకుడుగా క్రిష్ జాగర్లమూడి దర్శకత్వంలో మొదలుపెట్టిన హరిహర వీరమల్లు సినిమా షూటింగ్ ఎట్టకేలకు మళ్ళీ వచ్చే వారం నుంచి మొదలవబోతోంది. దీని కోసం విజయవాడలో ప్రత్యేకంగా సెట్ వేశారు.
వచ్చే వారం నుంచి పవన్ కళ్యాణ్‌ షూటింగులో పాల్గొనబోతున్నారు. ఈ సినిమాకి ఇదే ఆఖరి షెడ్యూల్. దీనిలో సుమారు 200 మంది జూనియర్ ఆర్టిస్టులతో కలిసి పవన్ కళ్యాణ్‌ తను చేయవలసిన సన్నివేశాలను పూర్తిచేయబోతున్నారు. బహుశః 10-15 రోజులలో ఈ ఆఖరి షెడ్యూల్ షూటింగ్ పూర్తయ్యే అవకాశం ఉందని సమాచారం.
చారిత్రిక నేపధ్యంతో తెరకెక్కిస్తున్న ఈ సినిమా షూటింగ్ చాలా ఆలస్యం అవడంతో దర్శకుడు మారారు. ఇప్పుడు క్రిష్ స్థానంలో జ్యోతీ కృష్ణ మిగిలిన సన్నివేశాలకు దర్శకత్వం వహించబోతున్నారు.
ఈ సినిమాని రెండు భాగాలలో తీయాలని మొదట అనుకున్నప్పటికీ, ఏపీ ఉప ముఖ్యమంత్రి, మంత్రిగా పవన్ కళ్యాణ్‌ చాలా కీలక బాధ్యతలు నిర్వర్తిస్తుండటంతో రెండో భాగం చేసే అవకాశం లేదనే భావించవచ్చు. ఈ సినిమాలో నిధీ అగర్వాల్ పవన్ కళ్యాణ్‌కి జోడీగా నటిస్తున్నారు.
ఈ సినిమాలో బాలీవుడ్‌ నటులు బాబీ డియోల్, అనుపమ్ ఖేర్, జాక్విలిన్ ఫెర్నాండస్, అర్జున్ రాంపాల్, ఇంకా విక్రమ్ జీత్, జిష్ణుసేన్ గుప్తా, నోరాహి ఫతేహి, ఆదిత్య మీనన్, శుభలేఖ సుధాకర్, పూజిత పొన్నాడ తదితరులు ముఖ్యపాత్రలు చేస్తున్నారు.
ఈ సినిమాకి కధ, దర్శకత్వం, స్క్రీన్ ప్లే: క్రిష్, సంగీతం: ఎంఎం కీరవాణి, పాటలు: స్వర్గీయ సిరివెన్నెల సీతారామ శాస్త్రి, చంద్రబోస్, కెమెరా: జ్ఞానశేఖర్, ఎడిటింగ్: శ్రవణ్, ఫైట్స్: రామ్-లక్ష్మణ్, శామ్ కౌశల్, దిలీప్ సుబ్బరాయన్.
మెగా సూర్య ప్రొడక్షన్స్ బ్యాననర్‌లో ఏఎం రత్నం రూ.150 కోట్ల భారీ బడ్జెట్‌తో ఈ సినిమాను నిర్మిస్తున్నారు. హరిహర వీరమల్లు వచ్చే ఏడాది మార్చి 28న ప్రపంచవ్యాప్తంగా విడుదల కాబోతోంది.
