మన శంకరవరప్రసాద్ గారితో వెంకీ మామ ఫెస్టివల్ సాంగ్‌

November 30, 2025


img

అనిల్ రావిపూడి దర్శకత్వంలో మెగాస్టార్ చిరంజీవి, నయనతార జంటగా చేస్తున్న ‘మన శంకరవరప్రసాద్ గారు...’ సంక్రాంతి పండగకి వస్తున్న సంగతి తెలిసిందే. ఈ సినిమాలో విక్టరీ వెంకటేష్ కూడా ఓ ముఖ్య పాత్ర చేస్తున్న సంగతి తెలిసిందే.

ప్రస్తుతం వారిద్దరిపై ఓ ఫెస్టివల్ సాంగ్‌ (బహుశః సంక్రాంతి పండగ పాట) హైదరాబాద్‌, గచ్చిబౌలిలోని ఓ క్లబ్బులో షూటింగ్ జరుగుతోంది. ఈ సినిమాలో ఈ పాట హైలైట్‌గా ఉంటుందని చిత్ర బృందం చెపుతోంది. 

దర్శకుడు అనిల్ రావిపూడి తాజా ఇంటర్వ్యూలో ‘గత ఏడాది ‘సంక్రాంతికి వస్తున్నాం’తో ప్రేక్షకులను అలరించాము.

ఈసారి ఈ సినిమాతో అంతకు రెట్టింపు వినోదం అందిస్తాము. ముఖ్యంగా చిరంజీవి ఫ్యామిలీ స్టోరీ చేసి చాలా ఏళ్ళు అయ్యింది. ఈ సినిమాలో ఆయన కామెడీ యాంగిల్ మొత్తం వాడేసుకొని అభిమానులను అలరిస్తాం.

ఇటీవల విడుదల చేసిన ‘మీసాల పిల్ల’ పాట వైరల్ అయ్యింది. త్వరలోనే రెండో పాట విడుదల చేయబోతున్నాము. అది మీసాల పిల్ల కంటే ఇంకా అద్భుతంగా ఉంటుంది. ఈ సినిమాతో చిరంజీవి తన అభిమానులకు ఊహించని సర్‌ప్రైజ్ ఇవ్వబోతున్నారు,” అని చెప్పారు

 ఈ సినిమాలో హర్షవర్ధన్, అభినవ్ గోమటం, సచిన్ కేడ్కర్‌ ముఖ్య పాత్రలు చేస్తున్నారు. 

ఈ సినిమాకు కధ, దర్శకత్వం: అనిల్ రావిపూడి, సంగీతం: భీమ్స్ సిసిరోలియో, కెమెరా: సమీర్ రెడ్డి, ఎడిటింగ్: తమ్మిరాజు చేస్తున్నారు. 

షైన్ స్క్రీన్స్, గోల్డ్ బాక్స్ ఎంటర్‌టైన్‌మెంట్స్‌ బ్యానర్లపై సాహు గారపాటి, సుష్మిత కొణిదెల నిర్మిస్తున్న ఈ సినిమా 2026, జనవరి 14న సంక్రాంతి పండుగకి విడుదల కాబోతోంది.


Related Post

సినిమా స‌మీక్ష