రాజాసాబ్ ఫస్ట్ సింగిల్ రెబెల్ సాబ్... పరవాలేదా?
మారుతి-ప్రభాస్ కాంబినేషన్‌లో ‘రాజాసాబ్’ ఫస్ట్ సింగిల్ సోమవారం సాయంత్రం విడుదలయ్యింది. ‘రెబెల్ సాబ్..’ అంటూ సాగే రామజోగయ్య వ్రాసిన ఈ పాటకి తమన్ సంగీతం అందించగా సంజీత్ హెగ్డే, బ్లేజ్ కలిసి పాడారు.
'పాన్ ఇండియా నంబర్ వన్ బ్యాచిలర్ వస్తున్నాడు స్టెప్ ఏ సైడ్' (పక్కకు తప్పుకోండి) అంటూ ప్రభాస్ గురించి వర్ణిస్తూ పాట వ్రాయడం బాగానే ఉంది. అలాగే మళ్ళీ చాలా రోజుల తర్వాత ప్రభాస్ ఇలాంటి సినిమా, పాటకి డాన్స్ చేయడం బాగుంది. ముఖ్యంగా రంగురంగుల దుస్తులు ధరించి ఈ గ్రూప్ సాంగ్‌ చేయడం చాలా బాగుంది. కానీ పాట సాహిత్యం, సంగీతం రెండూ మూస ధోరణిలో సాగినట్లనిపిస్తుంది.
కాస్త వయసు పెరిగిన సీనియర్ హీరోలు డాన్సులు చేయడానికి ఇబ్బంది పడుతుంటారు. కనుక వారి కోసం పెద్దగా మూమెంట్స్ లేనివిధంగా కోరియోగ్రఫీ చేస్తుంటారు. ప్రభాస్ వంటి ఎనర్జిటిక్ హీరోకి కూడా అలాంటి డాన్స్ మూమెంట్స్ కంపోజ్ చేయడం, అయన చేయడం ఆశ్చర్యం కలిగిస్తుంది.
ఇటీవల పెద్ది సినిమా నుంచి వచ్చిన ‘చికిరి చికిరి’ సాంగ్‌, దాని మ్యూజిక్, రామ్ చరణ్‌ చేసిన డాన్స్ ఆయన అభిమానులనే సినీ అభిమానులు అందరినీ అలరించింది. మరి ఈ పాట, మ్యూజిక్, డాన్స్ ఆ స్థాయిలో ఉన్నాయా? అంతగా ఆకట్టుకున్నాయా లేదా? అనేది రాజాసాబ్ టీమ్‌కే తెలియాలి.
ఈ సినిమాలో ప్రభాస్‌కు జోడీగా నిధి అగర్వాల్, మాళవిక మోహనన్ హీరోయిన్లుగా నటిస్తున్నారు. బాలీవుడ్ నటుడు సంజయ్ దత్ ఓ ముఖ్య పాత్ర చేస్తున్నారు.
రాజాసాబ్ సినిమాకు సంగీతం: ఎస్ఎస్ తమన్, కెమెరా: కార్తీక్ పళని, ఆర్ట్ డైరెక్టర్: రాజీవన్, ఎడిటింగ్: కోటగిరి వేంకటేశ్వర రావు చేస్తున్నారు.
పీపుల్ మీడియా ఫ్యాక్టరీ బ్యానర్‌పై టీజీ విశ్వప్రసాద్ తెలుగు, తమిళ్, కన్నడ, మలయాళం, హిందీ భాషల్లో పాన్ ఇండియా మూవీగా నిర్మిస్తున్నారు. రాజాసాబ్ జనవరి 9న సంక్రాంతి పండుగ ముందు ప్రేక్షకులను పలకరించబోతున్నారు.
