ఇస్రో జీఎస్ఎల్వీ ప్రయోగం విజయవంతం
భారత అంతరిక్ష సంస్థ (ఇస్రో) విజయాల జాబితాలో మరో విజయాన్ని నమోదు చేసుకొంది. శ్రీహరికోటలోని సతీష్ ధావన్ స్పేస్ సెంటర్ నుంచి ఈరోజు ఉదయం 10.15 గంటలకు ఇస్రో నమ్మిన బంటి జీఎస్ఎల్వీ ఎఫ్-12 ఉపగ్రహనౌక ఎన్‌వీఎస్-01 ఉపగ్రహాన్ని తీసుకొని నిప్పులు చిమ్ముతూ నింగిలోకి దూసుకుపోయింది. 19 నిమిషాలలో దానిని అంతరిక్షంలో నిర్దేశిత కక్ష్యలో విజయవంతంగా ప్రవేశపెట్టి, అంతరిక్ష రంగంలో భారత్‌కు తిరుగులేదని మరోసారి నిరూపించింది.
ఈరోజు ప్రయోగించిన ఎన్‌వీఎస్-01 ఉపగ్రహం దేశీయ నావిగేషన్ అవసరాల కోసం పనిచేస్తుంది. ఇదివరకు పంపిన ఉపగ్రహాలు గడువు ముగియడంతో వాటి స్థానంలో ప్రతీ 6 నెలలకు ఒకటి చొప్పున మొత్తం 4 నావిగేషన్ ఉపగ్రహాలను అంతరిక్షంలోకి ప్రవేశపెట్టబోతోంది. ఈ ఉపగ్రహం బరువు 2,232 కేజీలు. ఇది ఎల్-5, ఎస్ బ్యాండ్ సిగ్నల్స్ తో పనిచేస్తుంది. భూమి మీద తిరిగే వాహనాలకు, సముద్రాలు, నదులలో ప్రయాణించే పెద్దా చిన్నా షిప్పులకు, అలాగే విమానాలకు గ్లోబల్ పొజిషనింగ్ (జీపీఎస్), దిక్సూచి సేవలు అందిస్తుంది. పూర్తి స్వదేశీ పరిజ్ఞానంతో తయారు చేసిన ఈ ఉపగ్రహం నావిక్-01 పేరుతో భారత్‌కు రాబోయే 12 ఏళ్ళపాటు సేవలు అందిస్తుంటుంది.
4.jpg "భారత్‌ తొలి బుల్లెట్ రైలు..ఎన్నో విశేషాలు!")