మంటల్లో దగ్ధమైన ఐదు ప్రైవేట్ ట్రావెల్స్ బస్సులు
హైదరాబాద్‌లోని దుండిగల్ పరిధిలో గల బౌరంపేట బొడ్రాయి వద్ద ప్రైవేట్ ట్రావెల్స్ బస్సుల పార్కింగ్ యార్డులో భారీ అగ్నిప్రమాదం సంభవించింది. ఈ ప్రమాదంలో మొత్తం ఐదు ప్రైవేట్ ట్రావెల్స్ బస్సులు మంటల బారిన పడ్డాయి. యార్డులో పార్క్ చేసి ఉన్న ఒక బస్సులో మొదట మంటలు చెలరేగగా, క్షణాల్లోనే పక్కనే ఉన్న ఇతర బస్సులకు వేగంగా వ్యాపించాయి.
దీంతో అప్రమత్తమైన ఇతర బస్సుల డ్రైవర్లు, మంటలకు సమీపంలో ఉన్న తమ బస్సులను వెంటనే అక్కడి నుంచి సురక్షిత ప్రదేశానికి తరలించారు.
సమాచారం అందుకున్న దుండిగల్ అగ్నిమాపక సిబ్బంది హుటాహుటిన ఘటనా స్థలానికి చేరుకుని మంటలను అదుపులోకి తెచ్చారు. అయితే, అప్పటికే మూడు బస్సులు పూర్తిగా కాలిబూడిదవగా, మరో రెండు బస్సులు పాక్షికంగా దగ్ధమయ్యాయి. అదృష్టవశాత్తూ ఈ ప్రమాదంలో ఎలాంటి ప్రాణనష్టం జరగలేదని అధికారులు ప్రాథమికంగా నిర్ధారించారు.
బస్సుల్లో మంటలు ఎలా అంటుకున్నాయి? విద్యుత్ షార్ట్ సర్క్యూట్ వల్ల ప్రమాదం జరిగిందా, లేక ప్రైవేట్ ట్రావెల్స్ సంస్థల మధ్య ఉన్న పోటీ నేపథ్యంలో ఎవరైనా దుండగులు నిప్పు పెట్టారా? అనే కోణాల్లో దుండిగల్ పోలీసులు కేసు నమోదు చేసి దర్యాప్తు ప్రారంభించారు.
