దీపావళి కానుక కాదు.. మోసం జర భద్రం: సజ్జనార్
దీపావళి పండుగను కూడా సైబర్ నేరగాళ్లు తెలివిగా వాడేసుకుంటున్నారు. పేటీఎం సంస్థ దీపావళి కానుకగా ప్రతి ఒక్కరికీ రూ.1,000 నగదు అందిస్తోందంటూ వాట్సాప్, ఇతర సోషల్ మీడియా ప్లాట్‌ఫామ్‌లలో నకిలీ సందేశాలు వైరల్ చేస్తున్నారు.
ఈ సందేశాలను నమ్మి ఆ లింకులపై క్లిక్ చేస్తే వ్యక్తిగత సమాచారం, బ్యాంకు వివరాలు తస్కరించే ప్రమాదం ఉందని హైదరాబాద్ పోలీసులు హెచ్చరించారు.
ఈ నకిలీ సందేశాల్లో ప్రజలకు నమ్మకం కలిగించేలా మరో వ్యూహాన్ని కూడా ఉపయోగిస్తున్నారు. “మొదట ఇది ఫేక్ అనుకున్నా.. కానీ నిజంగానే నాకు రూ.1,000 వచ్చాయి. మీరు కూడా ప్రయత్నించండి,” అంటూ కొందరు దీపావళి కానుకగా వెయ్యి రూపాయలు పొందినట్లు సందేశాలు జత చేస్తున్నారు.
వీటిని చూసిన ప్రజలు నిజమేనని నమ్మి లింకులపై క్లిక్ చేసేలా సైబర్ క్రైమ్ మోసగాళ్ళు. ఆ తర్వాత వాళ్ళు ప్రజల వ్యక్తిగత సమాచారం, బ్యాంకింగ్ వివరాలు సేకరించి దోచుకుంటున్నారని, హైదరాబాద్ పోలీస్ కమిషనర్ వీసీ సజ్జనార్ ప్రజలను అప్రమత్తం చేశారు.
కనుక అనుమానాస్పద లేదా ఇలా ఊరించే లింకులపై క్లిక్ చేయవద్దని, బ్యాంకు ఖాతా వివరాలు, ఏటీఎం పిన్, ఓటీపీ, పాస్‌వర్డ్‌లను ఎవరితోనూ పంచుకోవద్దని సూచించారు. ఇలాంటి సందేశాలను నిజానిజాలు తెలుసుకోకుండా ఇతరులకు ఫార్వార్డ్ చేయవద్దని తెలిపారు.
పేటీఎం ఆఫర్ల గురించి తెలుసుకోవాలంటే సంస్థ అధికారిక వెబ్‌సైట్ లేదా గుర్తింపు పొందిన కమ్యూనికేషన్ మార్గాల ద్వారానే ధృవీకరించుకోవాలని సజ్జనార్ సూచించారు.
ఒకవేళ సైబర్ మోసానికి గురైతే వెంటనే 1930 హెల్ప్‌లైన్‌కు ఫోన్ చేయాలని లేదా www.cybercrime.gov.in వెబ్‌సైట్‌లో ఫిర్యాదు చేయాలని కోరారు.
'దీపావళి కానుక' పేరుతో సైబర్ కేటుగాళ్ల వల.. ప్రజలారా అప్రమత్తం!
‘పేటీఎం దీపావళి కానుకగా అందరికీ రూ.1,000 నగదు ఇస్తోంది.. వెంటనే క్లెయిమ్ చేసుకోండి’ అంటూ సోషల్ మీడియాలో, ముఖ్యంగా వాట్సాప్‌లో వైరల్ అవుతున్న సందేశం పచ్చి మోసం.
‘నేను ఫేక్ అనుకున్నా.. కానీ నిజంగానే రూ.1,000 వచ్చాయి.. మీరు ట్రై చేయండి’ అంటూ నమ్మించే రీతిలో కేటుగాళ్లు పన్నిన ఉచ్చు ఇది.
పండుగ పూట ప్రజల అమాయకత్వాన్ని, ఆశను ఆసరాగా చేసుకుని సైబర్ ముఠాలు కాటేసేందుకు సిద్ధమయ్యాయి.
ఇలాంటి సందేశాలతో పాటు వచ్చే అనుమానాస్పద లింకులను (`https://t.co/HKC4y4wh9s` వంటి నకిలీ వెబ్‌సైట్లు) పొరపాటున కూడా క్లిక్ చేయవద్దు.
ఈ లింకుల ద్వారా మీ వ్యక్తిగత సమాచారం, బ్యాంకింగ్ వివరాలు దొంగిలించడమే కాకుండా.. మీ ప్రమేయం లేకుండానే బ్యాంకు ఖాతాలు ఖాళీ అయ్యే ప్రమాదం ఉంది.
ఏ ప్రముఖ సంస్థ కూడా అపరిచిత లింకుల ద్వారా ఉచితంగా నగదు పంపిణీ చేయదని ప్రతి ఒక్కరూ గుర్తించాలి.
➡️ గుర్తుతెలియని, అనుమానాస్పద వెబ్‌సైట్ లింకులపై క్లిక్ చేయకండి.
➡️ నకిలీ ఆఫర్లను నిజమని నమ్మి ఇతర వాట్సాప్ గ్రూపులకు, బంధుమిత్రులకు ఫార్వర్డ్ చేసి ఇతరులనూ ముప్పులోకి నెట్టకండి.
➡️ ఎలాంటి సందర్భంలోనూ బ్యాంకింగ్ వివరాలు, యూపీఐ పిన్, ఓటీపీలను ఎవరితోనూ పంచుకోవద్దు.
➡️ ఒకవేళ మోసపోతే వెంటనే ఏమాత్రం ఆలస్యం చేయకుండా జాతీయ సైబర్ క్రైమ్ హెల్ప్‌లైన్ నంబర్ **1930** కు ఫోన్ చేయండి లేదా https://t.co/4kNdiBn0Yi) వెబ్‌సైట్‌లో ఫిర్యాదు నమోదు చేయండి.
#CyberSecurity #CyberAlert #FakeLinkScam #HyderabadPolice #SafeFestivities #StaySafeOnline
