బిహార్ సిత్రాలు: రోడ్డు పక్కన పదో తరగతి పరీక్షలు
డబుల్ ఇంజన్ సర్కార్ అంటే అభివృద్ధికి నిదర్శనం అంటుంది బిజేపి. బిహార్లో ఉన్నది అలాంటి డబుల్ ఇంజన్ సర్కారే! కనుక బిహార్లో అభివృద్ధి ఆషామాషీగా ఉండదు.
అదే స్థాయిలో ఉందో చూడాలంటే సోషల్ మీడియాలో వైరల్ అవుతున్న ఈ వీడియోని ఓసారి చూడాల్సిందే. బిహార్లో సివాన్ జిల్లాలో ఓ పల్లెటూరులో ఇటీవల పదో తరగతి పరీక్షలు జరిగాయి. అయితే అక్కడ పరీక్షా కేంద్రం (ఉందో లేదో తెలీదు)లో కూర్చునేందుకు, పరీక్ష వ్రాసేందుకు బల్లలు వంటివేవీ లేకపోవడంతో, పరీక్షల నిర్వాహకులు ఒక అద్భుతమైన ఆలోచన చేశారు.
ఆ ఊర్లో రోడ్డుకి ఇరువైపులా 10 అడుగుల దూరానికి ఓ విద్యార్ధి చొప్పున వరుసగా కూర్చోబెట్టి పరీక్షలు వ్రాయించారు. వారు రోడ్డు పక్కన కూర్చొని పరీక్షలు వ్రాస్తుంటే, వారి పక్క నుంచే ఊళ్ళో జనం వాహనాలపై సాగిపోతున్నారు. నిర్వాహకులు సైకిల్ వేసుకొని ఆ చివరి నుంచి ఈ చివరి వరకు రోడ్డుపై తిరుగుతూ విద్యార్ధులు కాపీ కొట్టకుండా అన్ని జాగ్రత్తలు తీసుకున్నారు.
ఏపీ, తెలంగాణ రాష్ట్రాలలో ఎక్కడైనా పాఠశాలలు శిధిలావస్థకు చేరుకుంటే ఆవరణలో చెట్ల కింద పాఠాలు చెపితే అందరూ విచిత్రంగా చూస్తారు. కానీ ఈ విచిత్రం ముందు అన్ని విచిత్రాలు దిగదుడుపేగా!
కొస మెరుపు: మొన్నటి వరకు నితీష్ కుమార్ సిఎంగా ఉండగా బిహార్ ఈ స్థాయికి అభివృద్ధి చేశారు. అయనని రాజ్యసభకి పంపించి, ఇప్పుడు బిజేపి ఆ పదవి తీసుకుంటోంది. కనుక బిహార్ మరెంత అభివృద్ధి చెందబోతోందో చూసి తీరాల్సిందే!
(video source: Big TV Breaking News)
