రంగారెడ్డిలో రోడ్డు ప్రమాదం నలుగురు యువకులు మృతి
ఈరోజు తెల్లవారుజామున రంగారెడ్డి జిల్లలో మోకిల పరిధిలో మీర్జాగూడ వద్ద ఘోర రోడ్డు ప్రమాదం జరిగింది. కారు అదుపు తప్పి రోడ్డు పక్కనే ఉన్న చెట్టును బలంగా ఢీ కొట్టింది. ఈ ప్రమాదంలో నలుగురు యువకులు ఘటనా స్థలంలోనే చనిపోగా నక్షత్ర అనే యువతి తీవ్రంగా గాయపడింది.
మృతులలో ముగ్గురు ఐసీఎఫ్ఏఐ యూనివర్సిటీ విదార్దులు, మరొకరు ఎంజీఐటి విద్యార్ధి. మృతులు సూర్యతేజ (బీబీఏ-2వ సం.), సుమిత్ (బీబీఏ-3వ సం.), శ్రీనిఖిల్(బీబీఏ-3వ సం.), రోహిత్ (ఎంజీఐటి విద్యార్ధి) అని పోలీసులు గుర్తించారు. వారి సహ విద్యార్ధిని నక్షత్ర (బీబీఏ-3వ సం.)ను సమీపంలో ప్రభుత్వాసుపత్రికి తరలించి వైద్యం అందిస్తున్నారు.
వీరందరూ మోకిల నుంచి హైదరాబాద్ వెళుతుండగా దట్టమైన పొగ మంచులో వేగంగా వెళుతున్న కారు అదుపు తప్పడంతో ఈ ప్రమాదం జరిగింది.
సంక్రాంతి పండుగకు ముందు జరిగిన ఈ ప్రమాదంలో నలుగురు యువకులు ప్రాణాలు కోల్పోయి, ఒకరు తీవ్రంగా గాయపడటంతో ఆ 5 కుటుంబాలలో తీవ్ర విషాదం నెలకొంది.
