టాలీవుడ్ వార్తలు

మరాఠా యోధుడు ఛత్రపతి శివాజీ జీవితగాధ ఆధారంగా రిషబ్‌ శెట్టి ప్రధాన పాత్రలో ‘ఛత్రపతి శివాజీ మహారాజ్‌’ అనే సినిమా చేస్తున్న సంగతి తెలిసిందే. ఈరోజు ఛత్రపతి శివాజీ జయంతి సందర్భంగా ఛత్రపతి శివాజీ మహారాజ్‌ పాత్రలో రిషబ్‌ శెట్టి ఫస్ట్-లుక్‌ పోస్టర్ విడుదల చేశారు. ఓ కొండ గుహలో అమ్మవారి విగ్రహం ఎదుట ఛత్రపతి శివాజీ ఖడ్గం పట్టుకుని నిలబడిన పోస్టర్ చాలా ఆకట్టుకుంటోంది.   

సందీప్ సింగ్ దర్శకత్వంలో తెరకెక్కిస్తున్న ఈ సినిమాని భారీ బడ్జెట్‌తో పాన్ ఇండియా మూవీగా 5 భాషల్లో నిర్మిస్తున్నారు. ఈ సినిమా 2027, జనవరి 21 న ప్రపంచవ్యాప్తంగా విడుదల కాబోతోంది. ఈ సినిమాలో నటించబోయే నటీనటులు, పనిచేయబోయే సాంకేతిక నిపుణుల వివరాలు ఇంకా తెలియవలసి ఉంది.  

రిషబ్‌ శెట్టి ప్రస్తుతం కాంతారా: చాప్టర్-2 చేస్తున్నారు. ప్రశాంత్  వర్మ తీస్తున్న ‘జై హనుమాన్’ సినిమాలో హనుమంతుడిగా నటిస్తున్నారు. వాటిలో కాంతారా చాప్టర్-2 ఈ ఏడాదిలోనే విడుదల కాబోతోంది. జైహనుమాన్ 2026లో విడుదల కాబోతోంది. ఛత్రపతి శివాజీ మహారాజ్‌ 2027లో విడుదల కాబోతోంది. అంటే ఏడాదికి ఒకటి చొప్పున రిషబ్‌ శెట్టి సినిమాలు వరుసగా విడుదలకాబోతున్నాయన్న మాట!