తెలంగాణ వార్తలు

భారతదేశంలో మొట్టమొదటి బుల్లెట్ ట్రైన్ ప్రాజెక్టుకు ఈరోజు (గురువారం) శంఖుస్థాపన జరుగబోతోంది. భారత ప్రధాని నరేంద్ర మోడీ, జపాన్ ప్రధానమంత్రి షింజో అబే కలిసి అహ్మదాబాద్ లో శంఖుస్థాపన చేస్తారు. నేటి నుంచి సరిగ్గా ఐదేళ్ళలో అంటే 2022 సం.లో ఈ బుల్లెట్ ట్రైన్ రెండు నగరాల మద్య దూసుకుపోవడం మొదలుపెడుతుంది. ఈ బుల్లెట్ ట్రైన్ గురించి చెప్పుకోవాలంటే చాలా విశేషాలే ఉన్నాయి.

1. దీనిని జపాన్ సంస్థలు నిర్మించబోతున్నాయి. ఈ ప్రాజెక్టు నిర్మాణానికి రూ.1.10 లక్షల కోట్లు ఖర్చు అవుతుంది. దానిలో సుమారు 80,000 కోట్లు జపాన్ ప్రభుత్వం 0.1 శాతం నామమాత్రపు వడ్డీతో అప్పుగా అందిస్తుంది. దానిని 50 ఏళ్ళలో తిరిగి చెల్లించవలసి ఉంటుంది. 

2.  ముంబై-అహ్మదాబాద్  మద్య దూరం 508 కిమీ. అత్యంత వేగంగా ప్రయాణించే మన ఎక్స్ ప్రెస్ ట్రైన్స్ కు ఆ దూరాన్ని అధిగమించడానికి సుమారు 7-8 గంటలు పైనే పడుతుంది. కానీ గంటకు సుమారు 250-320 వేగంతో ప్రయాణించే ఈ బుల్లెట్ ట్రైన్ కేవలం రెండున్నర గంటలలోనే చేరుకొంటుంది. కనుక దీనిని రోజుకు 35 ట్రిప్స్ వరకు తిప్పాలని సూత్రప్రాయంగా నిర్ణయించారు. భవిష్యత్ లో దీనికి ఉన్న డిమాండ్ ను బట్టి అవసరమైతే రోజుకు 70 ట్రిప్పులు తిప్పుకొనే విధంగా ఈ ప్రాజెక్టును నిర్మించబోతున్నారు.     

3. సాధారణ ఎక్స్ ప్రెస్ ట్రైన్స్ లో ఒక బోగీకి 72 మంది ప్రయాణికుల చొప్పున సుమారు 12 బోగీలలో 864 మంది ప్రయాణిస్తుంటే, ఈ బుల్లెట్ ట్రైన్ లో 750 మంది ప్రయాణించగలరు.

4. 508 కిమీ పొడవుండే దీని మార్గంలో దాదాపు 92 శాతం దీని కోసమే ప్రత్యేకంగా ఎలివేటడ్ రూట్ నిర్మించబోతున్నారు. అది సుమారు 467.36కిమీ పొడవు ఉంటుంది. 

5. మిగిలిన 8 శాతంలోనే అసలైన వింతలు, విడ్డూరాలు ఉంటాయి. దానిలో 6 శాతం సొరంగ మార్గం ఉంటుంది. దాని పొడవు సుమారు 21 కిమీ ఉంటుంది. ఇదే మన దేశంలో కెల్లా అతిపొడవైన రైల్వేసొరంగ మార్గం కాబోతోంది. 

6. ఈ 21 కిమీ సొరంగ మార్గంలో మళ్ళీ 7 కిమీ సముద్ర గర్భంలో నిర్మించబడుతుంది. అంటే బుల్లెట్ ట్రైన్ వేగమే ఒక అద్భుతమైన అనుభూతిని కలిగిస్తుందనుకొంటే, మళ్ళీ దానిలో కూర్చొని సముద్రగర్భంలో సొరంగం గుండా ప్రయాణించడం మరో థ్రిల్లింగ్ అనుభూతిని కలిగిస్తుందన్న మాట. మిగిలిన 2 శాతంలో సుమారు 13 కిమీ హైవేరోడ్డుకు ఆనుకొని ప్రత్యేకంగా నిర్మింపబడుతుంది. 

7. ఈ బుల్లెట్ ట్రైన్ ప్రయాణించే మార్గంలో మొత్తం 12 రైల్వే స్టేషన్లు ఉంటాయి. 

8. ఈ ప్రాజెక్టు 351 కిమీ గుజరాత్, 156 కిమీ మహారాష్ట్ర గుండా సాగుతుంది.  

9. ఈ బుల్లెట్ ట్రైన్ ను 2022 ఆగస్ట్ 15తేదీన నడిపించాలని ఇప్పుడే ముహూర్తం కూడా ఖరారు చేశామని రైల్వే మంత్రి పీయూష్ గోయల్ తెలిపారు. ఎందుకంటే ఆ రోజుకు మన దేశానికి స్వాతంత్ర్యం వచ్చి 75 ఏళ్ళు పూర్తవుతుంది కనుక. 

భారతీయుల కలలు సాకారం చేస్తున్నందుకు థాంక్స్ మోడీజీ..థాంక్యూ జపాన్!