తెలంగాణ వార్తలు

ప్రముఖ తెలుగు సినీ నటుడు జగపతి బాబుకు ఊహించని కొత్త సమస్యలు ఎదుర్కొంటున్నారు. ఆయనతో సహా కొంత మంది ఉన్నతాదాయ వర్గాలకు చెందినవారు హైదరాబాద్, కూకట్ పల్లిలో లోధా బిల్డర్స్ నిర్మించిన విలాసవంతమైన బెలిజా అపార్ట్మెంట్స్ లో ఫ్లాట్స్ కొనుగోలు చేశారు. ఆ సంస్థకు, వారికి జరిగిన ఒప్పందం ప్రకారం 10.5 ఎకరాల విస్తీర్ణంలో వాటిని నిర్మించి ఇవ్వాలి. మొదట వాటిని ఆవిధంగానే నిర్మించినప్పటికీ ఆ సంస్థ ఆ స్థలంలో మూడు ఎకరాలను తీసుకొని మెరిడియన్ అపార్ట్మెంట్ ను నిర్మించింది. అంతటితో ఆగకుండా జి.హెచ్.ఎం.సి. నిబంధనలకు విరుద్దంగా దాని చుట్టూ కాంపౌండ్ వాల్ కూడా నిర్మించింది. అది బెలిజా అపార్ట్మెంట్ వాసులతో చేసుకొన్న ఒప్పందాన్ని ఆ సంస్థ ఉల్లంఘించినట్లు అయిందని జగపతి బాబు ఆరోపించారు. లోధా సంస్థ బెలిజా అపార్ట్మెంట్స్ కు సమీపంలోనే కొత్తగా నిర్మిస్తున్న ఎండ్ అపార్ట్మెంట్స్ ను కూడా తమ ప్రాంగణంలోనే కలిపేస్తోందని దాని వలన తమ ప్రైవసీ దెబ్బతీస్తోందని అన్నారు. తమకు జరిగిన ఈ అన్యాయం గురించి జి.హెచ్.ఎం.సి.కమీషనర్ కు పిర్యాదు చేస్తామని అవసరమైతే న్యాయపోరాటం కూడా చేయడానికి సిద్దంగా ఉన్నామని చెప్పారు.