తెలంగాణ వార్తలు

ఇటీవల ఒడిశాలో జరిగిన రైళ్ళ ప్రమాదంలో 278 మరణించగా, వెయ్యికి పైగా ప్రయాణికులు గాయపడ్డారు. ఎలక్ట్రానిక్ ఇంటర్ లాకింగ్ వ్యవస్థలో ఎవరో ఉద్దేశ్యపూర్వకంగానే మార్పు చేయడం వలననే మెయిన్ లైన్లో వెళ్లవలసిన కోరమండల్ ఎక్స్‌ప్రెస్‌ లూప్ లైనులో ప్రయాణించి ఆ ట్రాక్ మీద నిలిపి ఉంచిన గూడ్స్ రైలును ఢీకొనడంతో ఈ ఘోరప్రమాదం జరిగిన్నట్లు రైల్వే సేఫ్టీ కమీషన్‌ ప్రాధమిక దర్యాప్తులో తేలింది. దాని ఆధారంగా ఒడిశా రైల్వే పోలీసులు ఇప్పటికే ఎఫ్ఐఆర్ నమోదు చేసి దర్యాప్తు చేస్తున్నారు. 

అయితే ఈ దుర్ఘటనలో కుట్ర జరిగిన్నట్లు అనుమానాలు వ్యక్తం అవుతుండటంతో కేంద్రం ఆదేశం మేరకు సీబీఐ రంగంలో దిగింది. మొత్తం పదిమంది సీబీఐ అధికారులు ఘటనా స్థలానికి చేరుకొని సాక్ష్యాధారాలను సేకరిస్తున్నారు. అలాగే ఈ ప్రమాదంలో ప్రత్యక్ష సాక్షులు, రైల్వే సిబ్బందిని, సహాయ చర్యలలో పాల్గొన్నవారిని, ఇంకా ఆసుపత్రులలో చికిత్స పొందుతున్న కోరమండల్ ఎక్స్‌ప్రెస్‌ లోకో పైలట్లను, క్షతగాత్రులను కూడా సీబీఐ అధికారులు ప్రశ్నించి, ఈ ప్రమాదం వెనుక నిజంగానే ఏదైనా కుట్ర జరిగిందా లేక మానవ తప్పిదం లేక సాంకేతిక లోపం వలన జరిగిందా?అనే విషయం కనిపెట్టనున్నారు. 

సీబీఐ దర్యాప్తు పూర్తవడానికి కనీసం రెండు నెలలు లేదా అంతకంటే ఎక్కువ సమయం పట్టవచ్చని సమాచారం. ఈ ఘటన గురించి ఎవరైనా సోషల్ మీడియాలో పుకార్లు వ్యాపింపజేసేందుకు ప్రయత్నిస్తే వారిపై కటిన చర్యలు తీసుకొంటామని కేంద్ర ప్రభుత్వం, ఒడిశా ప్రభుత్వం, సీబీఐ కూడా హెచ్చరించాయి.