తెలంగాణ వార్తలు

తెలంగాణ సచివాలయానికి సమీపంలో హుస్సేన్ సాగర్ ఒడ్డున నిర్మిస్తున్న అమరవీరుల స్తూపం నిర్మాణ పనులు చివరిదశకు చేరుకొన్నాయి. వచ్చే నెలలో దీనికి సిఎం కేసీఆర్‌ ప్రారంభోత్సవం చేస్తారని మంత్రి వేముల ప్రశాంత్ రెడ్డి తెలిపారు. 

వెలుగుతున్న దీపం ఆకారంలో నిర్మించిన ఈ స్తూపాన్ని పూర్తిగా స్టెయిన్‌ స్టీల్‌తో నిర్మించడం మరో విశేషం. దీనిలో ఓ అఖండ దీపం కూడా ఏర్పాటు చేయబోతున్నారు. మరో విశేషమేమిటంటే ఈ స్తూపం బలమైన గాలులను తట్టుకొంటూనే వెలుగుతున్న దీపంలా కాస్త అటూఇటూ కదులుతుంటుంది. సూర్యాస్తమయ సమయంలో ధగధగా వెలుగుతున్న దీపంలా కనిపిస్తుంది. కనుక అమరవీరుల స్తూపం చాలా విశిష్టమైనదే. 

దీని ఆవరణలో తెలంగాణ తల్లి విగ్రహం, ఫౌంటెయిన్, చుట్టూ ప్రమిద ఆకారంలో ఓ రెండు అంతస్తుల భవనం, దాని పైఅంతస్తులో ఓ రెస్టారెంట్, కింద అంతస్తులో 700 మంది సమావేశమయ్యేందుకు వీలుగా సకల సౌకర్యాలతో కూడిన ఓ కన్వెన్షన్ సెంటర్, ఇంకా ఎస్కలేటర్స్ వగైరా సదుపాయాలతో నిర్మిస్తున్నారు.

ఈ భవనంలో తెలంగాణ కోసం జరిగిన తొలి దశ, మలి దశ ఉద్యమాలు, అమరవీరుల వివరాలు, వారి త్యాగాలకు సంబందించి వివరాలు, పత్రికలలో వచ్చిన వార్తలు, ఫోటోలు, వీడియోలు, 15 నిమిషాలు నిడివిగల డాక్యుమెంటరీ ఫిల్మ్ వగైరా అన్నీ ఉంటాయి.

ఇక ఈ స్తూపం చుట్టూ చక్కటి ల్యాండ్ స్కేపింగ్ చేయిస్తుండటంతో చాలా ఆహ్లాదకరంగా ఉంటుంది. ఇక్కడికి వచ్చేవారి కోసం వాహనాల పార్కింగ్ సదుపాయం కూడా కల్పిస్తున్నారు.