తెలంగాణ వార్తలు

యూపీలో సోమవారం తెల్లవారుజామున ఘోర రోడ్డు ప్రమాదం జరిగింది. లక్నో నుంచి డిల్లీ వస్తున్న యూపీఎస్ ఆర్టీసీ బస్సు  డిల్లీ సమీపంలో యమునా ఎక్స్‌ప్రెస్‌ హైవేపై అదుపుతప్పి రోడ్డు పక్కనే 50 అడుగుల లోతున్న కాలువలో పడిపోయింది. ఈ ప్రమాదంలో 29 మంది అక్కడికక్కడే చనిపోగా బస్సులో ప్రయాణిస్తున్న మరో 20 మంది గాయపడ్డారు. సమాచారం అందుకొన్న పోలీసులు అక్కడకు చేరుకొని క్షతగాత్రులను అంబులెన్స్ లలో ఆసుపత్రులకు తరలించారు. డ్రైవరు నిద్రమత్తులో అతివేగంతో బస్సు నడపడం వలననే ఈ ప్రమాదం జరిగినట్లు ప్రాధమిక సమాచారం. 

165కిమీ పొడవుగల యమునా ఎక్స్‌ప్రెస్‌ హైవే డిల్లీ-నోయిడా-ఆగ్రా-లక్నో నగరాలను కలుపుతుంది. చాలా సువిశాలంగా ఉండే యమునా ఎక్స్‌ప్రెస్‌ హైవే రోడ్డుపై పెద్దగా సిగ్నల్స్, స్పీడ్ బ్రేకర్స్ వంటివి లేకుండా వాహనాలు చాలా వేగంగా, సౌకర్యంగా ప్రయాణించేందుకు వీలుగా నిర్మించబడింది. కానీ అవే కారణాల చేత ఆ రోడ్డుపై నిత్యం ప్రమాదాలు జరుగుతుండటం చాలా విచిత్రం. 

ఆ రోడ్డుపై గరిష్టంగా గంటకు 100 కిమీ వేగంతో మాత్రమే ప్రయాణించడానికి అనుమతి ఉన్నప్పటికీ, రోడ్డుపై ఎటువంటి అవరోదాలు లేకపోవడంతో గంటకు 130-150 కిమీకి మించిన వేగంతోనే వాహనాలు దూసుకుపోతుంటాయి. ఎక్స్‌ప్రెస్‌వే నిర్మించబడినప్పటి నుంచి నేటి వరకు వందలాది వాహనాలు ప్రమాదాలకు గురయ్యాయి. అనేకమంది వందల మంది ప్రాణాలు కోల్పోయారు. ఈ ప్రమాదం జరిగినప్పుడు బస్సు డ్రైవరు నిద్రలోకి జారుకున్నట్లు సమాచారం.