తెలంగాణ వార్తలు

ఢిల్లీలో టిఆర్ఎస్‌ పార్టీ కార్యాలయం నిర్మించబోతున్న సంగతి తెలిసిందే. ఢిల్లీలో వసంత్ విహార్ మెట్రో స్టేషన్ సమీపంలో 1300 గజాల విస్తీర్ణంలో దీనిని నిర్మించబోతున్నారు. సెప్టెంబర్ 2వ తేదీన సిఎం కేసీఆర్‌ దానికి భూమిపూజ చేస్తారు. ఆ కార్యక్రమానికి ఇంకా రెండు రోజులే ఉన్నందున ఈరోజు ఆయన ఢిల్లీ పర్యటన ఖరారు చేసినట్లు ముఖ్యమంత్రి కార్యాలయం ప్రకటించింది. 

సిఎం కేసీఆర్‌ ఢిల్లీ పర్యటన షెడ్యూల్: సెప్టెంబర్ 1వ తేదీ మధ్యాహ్నం ఒంటి గంటకు బేగంపేట విమానాశ్రయం నుంచి ప్రత్యేక విమానంలో ఢిల్లీ బయలుదేరుతారు. ఆరోజు రాత్రి తెలంగాణ భవన్‌లో బస చేసి మర్నాడు మధ్యాహ్నం 12.30 గంటలకు వసంత్ విహార్ చేరుకొని భూమిపూజ కార్యక్రమంలో పాల్గొంటారు. ఈ కార్యక్రమంలో టిఆర్ఎస్‌ మంత్రులు, ఎంపీలు, ఎమ్మెల్యేలు, ఎమ్మెల్సీలు పాల్గొంటారు. సెప్టెంబర్ 3వ తేదీ మధ్యాహ్నం మళ్ళీ హైదరాబాద్‌ తిరుగుప్రయాణం అవుతారు. దీని నిర్మాణం పూర్తయి అందుబాటులోకి వస్తే దక్షిణాది ప్రాంతీయ పార్టీలలో ఢిల్లీలో కార్యాలయం కలిగిన ఏకైక పార్టీ టిఆర్ఎస్‌ అవుతుంది.