తెలంగాణ వార్తలు

ఆర్టీసి చైర్మన్, రామగుండం తెరాస ఎమ్మెల్యే సోమారపు సత్యనారాయణ సోమవారం ఉదయం ఒక సంచలన ప్రకటన చేశారు. రామగుండంలో అయన మీడియాతో మాట్లాడుతూ, “జిల్లాలో కొందరు పార్టీ నేతలు పార్టీ వ్యతిరేక కార్యక్రమాలకు పాల్పడుతున్నారని అధిష్టానానికి చెప్పినా పట్టించుకోవడంలేదని ఈ పరిస్థితులలో తాను ఇక పార్టీలో కొనసాగలేనని కనుక రాజకీయ సన్యాసం తీసుకోవాలని నిర్ణయించుకున్నాను,” అని చెప్పారు. 

గత కొన్ని నెలలుగా ఆయనకు, రామగుండం మేయర్ కొంకటి లక్ష్మినారాయణకు మద్య విభేదాలు కొనసాగుతుండటంతో మంత్రి కేటిఆర్ వారిద్దరితో మాట్లాడారు. కానీ ఆ తరువాత వారి విభేదాలు మరింత పెరిగాయే తప్ప తగ్గలేదు. ఎమ్మెల్యే సత్యనారాయణ తెరాస, కాంగ్రెస్, భాజపా కార్పోరేటర్లను కూడగట్టి మేయర్, డిప్యూటీ మేయర్లపై అవిశ్వాసతీర్మానం నోటీస్ ఇప్పించడంతో రామగుండంలో తెరాస రెండు వర్గాలుగా చీలిపోయింది. మొన్న శనివారం కార్పోరేషన్ స్టాండింగ్ కమిటీలో 5 స్థానాలకు ఎన్నికలు జరుపగా వాటిలో ఎమ్మెల్యే వర్గం మూడు స్థానాలను, మేయర్ వర్గం, కాంగ్రెస్ పార్టీలు చెరో స్థానం గెలుచుకొన్నాయి. ఈ నేపధ్యంలో ఎమ్మెల్యే సత్యనారాయణ ఈరోజు ఉదయం రాజకీయ సన్యాసం చేస్తానని అధిష్టానానికి తుది హెచ్చరిక పంపారు. కనుక రామగుండంలో తెరాసకు నష్టం కలుగకుండా నివారించేందుకు తెరాస అధిష్టానం ఈ సమస్యపై ఏ వర్గంపై చర్యలు తీసుకొంటుందో చూడాలి.

సంబంధిత వార్త: http://www.mytelangana.com/telugu/latest-news/12490/trs-mayor-pulled-down-by-trs-mla-with-congress-bjp-support