భారత్‌లో పర్యటించనున్న న్యూజిల్యాండ్ జట్టు
న్యూజిలాండ్ క్రికెట్ జట్టు త్వరలో భారత్‌లో పర్యటించనుంది. న్యూజిలాండ్(కివీస్)తో భారత్ మూడు టి-20 లు, రెండు టెస్ట్ మ్యాచ్‌లు ఆడనుంది. ఈ నేపథ్యంలో మంగళవారం భారత క్రికెట్ కంట్రోల్ బోర్డు( బీసీసీఐ) మూడు టి-20 మ్యాచ్‌లకు జట్టును ప్రకటించింది.
టి-20 తరువాత కెప్టెన్సీ నుంచి విరాట్ కోహ్లీ తప్పుకోవడంతో పిచ్ హిట్టర్ రోహిత్ శర్మకు బీసీసీఐ ఆ బాధ్యతలను అప్పగించింది. ఈ మ్యాచ్‌లలో విరాట్ కోహ్లీ, హార్దిక్ పాండ్యా, జస్ప్రిత్ బూమ్రా, మహమ్మద్ షమీలకు విశ్రాంతినిచ్చింది. ఈసారి జట్టులో పాత, కొత్త సభ్యులు ఉండేలా బీసీసీఐ జట్టును కూర్చింది. టీమ్ ఇండియా చీఫ్ కోచ్‌గా రవిశాస్త్రి పదవి నుంచి తప్పుకున్న తర్వాత రాహుల్ ద్రవిడ్‌కు ఆ బాధ్యతలు అప్పగించింది. కనుక కోచ్ రాహుల్ ద్రవిడ్, కెప్టెన్ రోహిత్ శర్మలకు ఇదే మొదటి టి-20 సిరీస్ కానుంది. వైస్ కెప్టెన్‌గా కేఎల్ రాహుల్‌ను నియమించింది. ఐపీఎల్లో బ్యాటింగ్, బౌలింగ్, ఫీల్డింగ్‌లలో అదరగొట్టిన ఆటగాళ్లకు బీసీసీఐ ఈసారి అవకాశం ఇచ్చింది.హైదరాబాద్ బౌలర్ మహమ్మద్ సిరాజ్‌ను జట్టులోకి తిరిగి తీసుకున్నారు. న్యూజిల్యాండ్‌తో జరుగబోయే ఈ సిరీస్ భారత్‌లో జరుగబోతున్నందున భారత్ జట్టుకి విజయావకాశాలు ఎక్కువగా ఉంటాయని భావించవచ్చు.
భారత్ వర్సెస్ న్యూజీలాండ్ టి-20 షెడ్యూల్:
మొదటి టి-20: నవంబర్ 17న, వేదిక: సవాయ్ మాన్సింగ్ స్టేడియం, జైపూర్, రాజస్థాన్.
2వ టి-20: నవంబర్ 19, వేదిక: ఝార్ఖండ్ అంతర్జాతీయ క్రికెట్ స్టేడియం, రాంచి, ఝార్ఖండ్.
3వ టి-20: నవంబర్ 21, వేదిక: ఈడెన్ గార్డెన్స్, కోల్‌కతా, పశ్చిమ బెంగాల్.
వీటి తర్వాత భారత్-కివీస్ రెండు టెస్ట్ మ్యాచ్‌లు ఆడనున్నాయి.
టి-20 భారత జట్టు: రోహిత్ శర్మ(కెప్టెన్), కేఎల్ రాహుల్( వైస్ కెప్టెన్), రుతురాజ్ గైక్వాడ్, శ్రేయస్ అయ్యర్, సూర్యకుమార్ యాదవ్, వెంకటేష్ అయ్యర్, యజుర్వేద చాహల్, రవిచంద్రన్ అశ్విన్, అక్షర్ పటేల్, ఆవేశ్ ఖాన్, భువనేశ్వర్ కుమార్, దీపక్ చాహర్, హర్షల్ పటేల్, మహమ్మద్ సిరాజ్.
