మహిళా దినోత్సవంనాడు చెత్తకుండీలో ఆడశిశువు!
నేడు ప్రపంచ వ్యాప్తంగా అన్ని దేశాలలో మహిళ దినోత్సవం వేడుకలు జరుపుకొంటున్నారు. మహిళలు ఎదుర్కొంటున్న సమస్యల గురించి, మహిళాభ్యుదయం గురించి గంభీరమైన ప్రసంగాలు మారుమ్రోగుతున్నాయి. సరిగ్గా ఈరోజునే మహబూబాబాద్ జిల్లాలో అప్పుడే పుట్టిన పసికందును ఓ కసాయి తల్లితండ్రులు గోనె సంచీలో చుట్టి చెత్తకుండీలో పడేసి వెళ్ళిపోయారు. జిల్లాలోని డోర్నకల్ మండలం, బూర్గుంపాడులో ఈ హృదయవిదారకమైన దారుణం జరిగింది. అటుగా వెళుతున్న కొందరు కూలీలు చెత్తకుండీలో నుంచి శిశువు ఏడుపు వినిపించడంతో వెళ్ళి చూడగా వారికి గోనెసంచీలో చుట్టిన ఆడశిశువు కనిపించింది. పుట్టింది ఆడపిల్ల కనుకనే తల్లితండ్రులు ఆ శిశువును నిర్ధయగా చెత్తకుండీలో పడేసి వెళ్ళిపోయి ఉండవచ్చని స్థానికులు భావిస్తున్నారు. సమాచారం అందుకొన్న పోలీసులు శిశువును ఏరియా ఆసుపత్రిలో చేర్చి కేసు నమోదు చేసుకొని దర్యాప్తు చేస్తున్నారు.
