రైలు ఢీకొనడంతో మహబూబాబాద్‌లో ఇద్దరు ట్రాక్‌మెన్ మృతి
మహబూబాబాద్‌ రైల్వే స్టేషన్ పరిధిలో శుక్రవారం ఘోర ప్రమాదం జరిగింది. పాషా, కమలాకరచారి అనే ఇద్దరు ట్రాక్‌మెన్ రైల్వేస్టేషన్‌ సమీపంలో రైల్వే ట్రాక్‌లకు మరమత్తులు చేస్తుండగా, పొరపాటున అదే ట్రాక్‌పైకి వేగంగా ఓ రైలు దూసుకువచ్చి వారిని బలంగా ఢీకొనడంతో ఇద్దరూ ఘటనాస్థలంలోనే మృతి చెందారు.
రైల్వే ట్రాక్‌పై కార్మికులు మరమత్తు పనులు చేస్తుంటే, ఆ ట్రాక్‌పైకి ఏ రైలు వెళ్ళకుండా నివారించేందుకు సిగ్నలింగ్, రైల్వే భద్రత, రైల్వే ఇంజనీరింగ్ తదితర విభాగాల సిబ్బంది సమన్వయంతో పనిచేస్తుంటారు. కానీ ఈసారి వారి మద్య ఎక్కడో సమన్వయలోపం జరుగడంతో ఈ ఘోర ప్రమాదం జరిగినట్లు తెలుస్తోంది. ఒకవేళ రైల్వే ట్రాక్‌పై ఎక్కువ మంది పనిచేస్తుంటే వారిలో ఎవరో ఒకరు ఎర్రజెండా పట్టుకొని నిలబడి రైళ్ళ రాకపోకలను గమనిస్తూ ఇటువంటప్పుడు ముందుగా హెచ్చరిస్తుంటారు. కానీ ఈ ప్రమాదం జరిగినప్పుడు వారిద్దరే పనిచేస్తుండటంతో వారు మీదకు దూసుకువస్తున్న రైలును గుర్తించేలోగా ఈ ఘోర ప్రమాదం జరిగిపోయింది. సమాచారం అందుకొన్న పోలీసులు అక్కడకు చేరుకొని కేసు నమోదు చేసుకొని, మృతదేహాలను పోస్టుమార్టం కొరకు స్థానిక ప్రభుత్వాసుపత్రికి తరలించారు.
7.jpg "ఈటల నామినేషన్ వేశారు... గెలుస్తారా?")
