టాలీవుడ్ వార్తలు

మంచు విష్ణు డ్రీమ్ ప్రాజెక్ట్ ‘కన్నప్ప’లో నటిస్తున్న అందరి ఫస్ట్-లుక్‌ పోస్టర్స్ విడుదలయ్యాయి. చిట్టచివరిగా ప్రభాస్‌ పోస్టర్ కూడా విడుదల చేశారు. ఈ సినిమాలో ప్రభాస్‌ రుద్రుడుగా నటిస్తున్నారు. ‘ప్రళయకాల రుద్రుడు, త్రికాల మార్గ దర్శకుడు శివాజ్ఞ పరిపాలకుడు,’ అంటూ ప్రభాస్‌ పాత్రని పరిచయం చేశారు. 

ప్రభాస్‌ వంటి ఆరడుగుల అందగాడు తొలిసారిగా పౌరాణిక సినిమా ‘ఆదిపురుష్‌’లో శ్రీరాముడుగా నటిస్తుంటే, అందరూ ఆ సినిమా మహాద్భుతంగా ఉంటుందని, ప్రభాస్‌ని గొప్పగా చూపిస్తారని ఆశించారు. కానీ దర్శకుడు ఓం రౌత్ పిచ్చి ప్రయోగాలు చేసి అందరినీ నిరాశ పరచడమే కాకుండా తీవ్ర విమర్శలకు గురయ్యారు.

ఆదిపురుష్‌ తర్వాత ప్రభాస్‌ మళ్ళీ కన్నప్పలో రుద్రుడుగా పౌరాణిక పాత్ర చేస్తున్నారు. రెండు చేతులకు, మెడలో రుద్రాక్షమాలలు, నుదుట విభూతి నామాలతో ఉన్న ప్రభాస్‌ గెటప్ చూసి అభిమానులు ఉప్పొంగి పోతున్నారు. ఈసారి రుద్రుడు పాత్ర కన్నప్పలో హైలైట్ అవుతుందని ఆశిస్తున్నారు.       

హిందీలో ‘మహా భారత్’ సీరియల్ అద్భుతంగా తీసి మెప్పించిన బాలీవుడ్ దర్శకుడు ముఖేష్ కుమార్‌ సింగ్‌ దర్శకత్వంలో కన్నప్ప తెరకెక్కిస్తునందున ఈ సినిమా తప్పకుండా సూపర్ హిట్ అవుతుందని అందరూ ఆశిస్తున్నారు. 

ఆ నమ్మకంతోనే అవా ఎంటర్‌టైన్‌మెంట్స్ మరియు 24 ఫ్రేమ్స్ ఫ్యాక్టరీ బ్యానర్లపై మోహన్ బాబు, మంచు విష్ణు సుమారు రూ.200 కోట్ల భారీ బడ్జెట్‌తో ఈ సినిమాని 5 భాషల్లో నిర్మిస్తున్నారు.

ఈ సినిమాలో శివపార్వతులుగా బాలీవుడ్‌ నటుడు అక్షయ్ కుమార్, కాజల్ అగర్వాల్ నటిస్తున్నారు. బాలీవుడ్‌ నటి నుపూర్ సనన్ మంచు విష్ణుకి జోడీగా నటిస్తోంది. మోహన్ బాబు, బ్రహ్మానందం, శరత్ కుమార్, మోహన్ లాల్ తదితరులు ముఖ్యపాత్రలు చేస్తున్నారు.

కన్నప్ప సినిమాకు మణిశర్మ, స్టీఫెన్ దేవాస్సీ: సంగీతం, షెల్డన్ షావ్: కెమెరా, చిన్న ఆర్ట్ డైరెక్టర్‌గా పనిచేస్తున్నారు. ఏప్రిల్ 25న కన్నప్ప ప్రపంచవ్యాప్తంగా విడుదల కాబోతోంది.