టాలీవుడ్ వార్తలు

జాంబియా రెడ్డి సినిమాతో తొలిసారిగా తెలుగు ప్రేక్షకులకు ‘జాంబియా’లను పరిచయం దర్శకుడు ప్రశాంత్ వర్మ, మళ్ళీ తేజ సజ్జాతోనే హనుమాన్ అనే సైన్స్ ఫిక్షన్ సినిమా సిద్దం చేస్తున్న సంగతి తెలిసిందే. ఈ సినిమా ఫస్ట్-లుక్ పోస్టర్‌, టీజర్ అందరినీ ఆకట్టుకొన్నాయి.

ముఖ్యంగా ప్రభాస్ నటించిన ఆదిపురుష్ సినిమాలో గ్రాఫిక్స్ కంటే హనుమాన్ సినిమాలో గ్రాఫిక్స్ చాలా అద్భుతంగా ఉండటంతో ఈ సినిమాపై భారీ అంచనాలు ఏర్పడ్డాయి. నిజానికి ఈ సినిమా మే నెలలోనే విడుదల కావలసి ఉన్నప్పటికీ, ఆదిపురుష్ కోసం హనుమాన్ వెనక్కు తగ్గిన్నట్లు తెలుస్తోంది. కానీ గ్రాఫిక్స్ వర్క్స్ ఆలస్యం కావడం వలన సినిమా రిలీజ్ వాయిదా వేసుకొన్నామని ప్రశాంత్ వర్మ చెప్పుకొన్నారు. అది వేరే విషయం. 

ఈ సినిమాని వచ్చే ఏడాది జనవరి 12న సంక్రాంతి పండుగ సందర్భంగా విడుదల చేయబోతున్నట్లు ప్రకటించారు.  సంక్రాంతికి పెద్ద సినిమాలు విడుదలవుతున్నప్పటికీ ఈసారి సినిమా వాయిదా వేసే ప్రసక్తేలేదని, జనవరి 12నే హనుమాన్ వస్తున్నాడని స్పష్టం చేశారు. 

ఈ సినిమాలో తేజ సజ్జా, అమృత అయ్యర్ జంటగా నటిస్తున్నారు. వరలక్ష్మి శరత్ కుమార్‌, వెన్నెల కిషోర్, వినయ్ రాయ్, సత్య, గెటప్ శ్రీను, రాజ్ దీపక్ శెట్టి ముఖ్యపాత్రలు చేస్తున్నారు. 

ఈ సినిమాకు సంగీతం: అనుదీప్ దేవ్, హరిగౌర, కృష్ణ సౌరభ్, కెమెరా: దాశరధి శివేంద్ర అందిస్తున్నారు. ఈ సినిమాను తెలుగు, తమిళ్, కన్నడ, మళయాళం , హిందీ, మరాఠీ భాషలతో పాటు ఇంగ్లీష్, జపనీస్, కొరియన్, చైనీస్, స్పానిష్ భాషలలోను విడుదల చేయబోతున్నారు. 

ప్రైమ్‌షో ఎంటర్‌టైన్‌మెంట్‌ బ్యానర్‌పై కె.నిరంజన్ రెడ్డి ఈ సినిమాను నిర్మిస్తున్నారు.