టాలీవుడ్ వార్తలు

ప్రముఖ నటి, దర్శకురాలు, నిర్మాత జీవిత రాజశేఖర్ దాదాపు 33 ఏళ్ల తర్వాత మళ్ళీ సినిమాలలో నటించనున్నారు. కోలీవుడ్‌ సూపర్ స్టార్ రజనీకాంత్, విశాల్‌ హీరోలుగా తీయబోతున్న ‘లాల్ సలాం’ సినిమాలో రజనీకాంత్ సోదరిగా జీవిత నటించబోతున్నారు. ఈ సినిమాని ఆయన కుమార్తె ఐశ్వర్య దర్శకత్వం చేయబోతున్నారు. లైకా ప్రొడక్షన్స్ నిర్మించబోతున్న ఈ సినిమా రెగ్యులర్ షూటింగ్ మార్చి 7వ తేదీ నుంచి ప్రారంభమవుతుంది. ఈ సినిమాకి ఏఆర్ రహమాన్ సంగీతం అందిస్తున్నారు. 

నటి జీవిత గతంలో పలువురు హీరోలతో తెలుగు, తమిళ్ సినిమాలలో నటించారు. చివరిగా రాజశేఖర్ హీరోగా 1990లో విడుదలైన మగాడు సినిమాలో నటించారు. ఆ మరుసటి సంవత్సరంలో వారిరువురూ పెళ్లి చేసుకొన్నాక ఆమె సినిమాలలో నటించడం మానుకొన్నారు. అయితే 2002లో శేషు సినిమాతో దర్శకురాలిగా మారారు. తమిళంలో సేతు సినిమాని తెలుగులో శేషుగా రీమేక్ చేస్తూ దానిలో  తన భర్త రాజశేఖర్‌ని హీరోగా పెట్టి తీయగా ఆ సినిమాతో ఆమెకి దర్శకురాలిగా తన ప్రతిభ నిరూపించుకొన్నారు. ఆ తర్వాత రాజశేఖర్ హీరోగా సత్యమేవ జయతే, శేఖర్ తదితర సినిమాలకు దర్శకత్వం వహించారు. ఆప్తుడు, ఎవడైతే నాకేంటి, మహంకాళి, శేఖర్  సినిమాలను నిర్మించి నిర్మాతగా కూడా జీవిత గుర్తింపు సంపాదించుకొన్నారు. 

రజనీకాంత్ ప్రస్తుతం నెల్సన్ దర్శకత్వంలో ‘జైలర్’ సినిమా చేస్తున్నారు. ఈ సినిమాలో శివ రాజ్‌కుమార్, రమ్య రామకృష్ణ, తమన్నా, సునీల్, జాకీ ష్రఫ్ తదితరులు నటిస్తున్నారు.