టాలీవుడ్ వార్తలు

ఎస్.శంకర్ దర్శకత్వంలో రామ్ చరణ్‌, కియరా అద్వానీ జంటగా ఓ సినిమా వస్తున్న సంగతి తెలిసిందే. ఆ సినిమా షూటింగ్‌లో దర్శకుడు శంకర్ ఎన్ని జాగ్రత్తలు తీసుకొన్నప్పటికీ కొన్ని ఫోటోలు లీక్ అయ్యాయి. అప్పుడే అవి సోషల్ మీడియాలో వైరల్ అయిపోయాయి కూడా. 

వాటిలో రామ్ చరణ్‌ పంచెకట్టుతో తన భార్య (అంజలి), కొడుకుతో కలిసి దిగిన ఓ ఫోటో ఉంది. మరొకటి పంచెకట్టులోనే ఇంటి గుమ్మం ముందు కూర్చొని ఏదో లెక్కలు చూస్తున్నట్లుంది. ఇదివరకు లీక్ అయిన ఓ ఫోటోలో రామ్ చరణ్‌ రిక్షా తొక్కుతున్నట్లుంది. ఫస్ట్-లుక్‌ పోస్టరులో రామ్ చరణ్‌ సూటు, బూటూ, కళ్ళకు గ్లాసస్ ధరించి చేతిలో ఫైల్ పట్టుకొని వెళుతున్నట్లు చాలా స్టయిలిష్‌గా చూపారు. 

అంటే ఈ సినిమాలో రామ్ చరణ్‌ రిక్షా తొక్కుకొని జీవించే ఓ తండ్రిగా, ఓ ఉన్నతాధికారి(ఐఏఎస్)గా రెండు విభిన్నమైన పాత్రలు చేస్తున్నట్లు స్పష్టమైంది. అలాగే తండ్రి పాత్రలో రామ్ చరణ్‌కు జోడీగా అంజలి, కొడుకు పాత్రకు జోడీగా కియరా అద్వానీ నటించినట్లు స్పష్టమవుతోంది. ఈ సినిమాలో ఎస్ జే సూర్య, సునీల్, నాజర్, రఘుబాబు, జయరాం, సముద్రఖని, శ్రీకాంత్, నవీన్ చంద్ర తదితరులు ముఖ్యపాత్రలు చేస్తున్నారు. 

ఈ సినిమాను సుమారు రూ.170 కోట్ల భారీ బడ్జెట్‌తో  దిల్‌రాజు, అల్లు శిరీష్ కలిసి శ్రీ వేంకటేశ్వర క్రియెషన్స్ పతాకంపై నిర్మిస్తున్నారు. కార్తీక్ సుబ్బరాజు అందించిన కధతో రూపొందున్న ఈ సినిమాకు ‘అధికారి’ అనే టైటిల్ ఖరారు చేసినట్లు సమాచారం. కెమెరా తిరు, ఆర్‌ రత్నవేలు, థమన్ సంగీతం అందిస్తున్నారు. గత ఏడాది అక్టోబర్‌లో ఈ సినిమా షూటింగ్‌ ప్రారంభించి హైదరాబాద్‌, విశాఖపట్నం, మహారాష్ట్ర, పంజాబ్‌లో కొన్ని కీలక సన్నివేశాలు తీశారు. 2023, వేసవి సెలవులలో ఈ సినిమా విడుదలయ్యే అవకాశం ఉంది.