టాలీవుడ్ వార్తలు

తెలుగు సినీ పరిశ్రమలో తిరుగులేని విజయాలతో దూసుకుపోతున్న నటి సాయి పల్లవి, ఎప్పుడూ వివాదాలకు దూరంగా ఉంటుంది. అయితే ఇప్పుడు కోర్టు చుట్టూ తిరగాల్సివస్తోంది. మతం పేరుతో ఎవరినీ వేధించడం సరికాదని ఆమె చెప్పిన మాటలే ఆమె మెడకి చుట్టుకొన్నాయి. 

ఓ తాజా ఇంటర్వ్యూలో ఆమె ఈ అంశంపై స్పందిస్తూ, “కాశ్మీరీ ఫైల్స్ చిత్రం చూసినప్పుడు దానిలో కాశ్మీరీ పండిట్లు పడిన బాధలు చూసి నేను చాలా చలించిపోయాను. అదేవిదంగా గోరక్షకుల పేరుతో ఎవరినీ వేధించడం సరికాదని భావిస్తున్నాను,” అని అన్నారు. ఈ మాటలే వివాదస్పదమయ్యాయి. 

ఆమె వ్యాఖ్యలపై హైదరాబాద్‌లో హిందూ సంఘాలు ఆగ్రహం వ్యక్తం చేస్తూ సుల్తాన్ బజార్ పోలీస్‌స్టేషన్‌లో ఫిర్యాదు చేయడంతో, ఆ కేసు కోర్టుకి వెళ్ళింది. 

సాయి పల్లవి వెంటనే స్పందిస్తూ, “నేను ఎవరినీ బాధపెట్టాలనే ఉద్దేశ్యంతో ఆ మాటలు అనలేదు. కులం, మతం పేరుతో ఎవరూ వేదింపులకు పాల్పడటం సరికాదని మాత్రమే చెప్పాలనుకొన్నాను. కానీ నా మాటల వలన కొందరు బాధపడ్డారని తెలుసుకోగానే మళ్ళీ మీడియా ముందుకు వచ్చి క్షమాపణలు కోరుతున్నాను,” అని వివరణతో పాటు క్షమాపణలు కూడా చెప్పుకొన్నారు. 

ఆ కేసు హైకోర్టుకి వెళ్ళడంతో దానిని కొట్టివేయవలసింది అభ్యర్ధిస్తూ ఆమె పిటిషన్‌ వేశారు. కానీ హైకోర్టు ఆమె పిటిషన్‌ను తిరస్కరించింది. కనుక సాయి పల్లవి ఈ కేసు విచారణకు హాజరు కావలసిరావచ్చు.