తెలంగాణ వార్తలు

బిఆర్ఎస్‌ ఎమ్మెల్యేల కొనుగోలు కేసులో అరెస్ట్ అయిన రామచంద్రభారతి, సింహయాజీ, నందా కుమార్‌ ముగ్గురు నిందితులతో తమకి ఎటువంటి సంబందామూ లేదని చెప్పిన బిజెపి నేతలు అప్పుడు భుజాలు ఎందుకు తడుముకొన్నారు? వారి తరపున కోర్టులలో కేసులు ఎందుకు వేశారు? ఈ కేసు దర్యాప్తుని హైకోర్టు సీబీఐకి బదిలీ చేస్తే ఇప్పుడు చంకలు ఎందుకు గుద్దుకొంటున్నారు? సంబందం లేదని చెప్పిన ఆ ముగ్గురు నిందితులని భుజాలకెత్తుకొని ఎందుకు మోస్తున్నారంటూ మంత్రి కేటీఆర్‌ బిజెపి నేతలకు ట్వీట్ చురకలు వేశారు. 

కేంద్ర మంత్రి కిషన్ రెడ్డిని ఉద్దేశ్యిస్తూ పోస్ట్ చేసిన తాజా ట్వీట్‌లో “మీ బండారమంతా కెమెరాల సాక్షిగా బయటపడినప్పుడు మీ వెన్నులో వణుకు మొదలైంది. ఆ కేసును సీబీఐకి అప్పగించగానే అందరూ సంబురపడుతున్నారు. అంటే మీ మోడీ జేబు సంస్థకి ఈ కేసు చిక్కిందనే కదా?ఒకప్పుడు సిబిఐ కి కేసు ఇస్తే నిందితులు భయపడే పరిస్థితి నుండి ఇవ్వాళ సిబిఐ కి కేసు అప్పజెప్తే మీరు సంబరాలు చేసుకుంటున్నారు అంటేనే ఆ సంస్థను మీ హయాంలో ఎంత నీరుగార్చారో అర్థమవుతుంది   కెమెరాల సాక్షిగా, తెలంగాణ ప్రభుత్వాన్ని కూలదోయడానికి ప్రయత్నించి అడ్డంగా దొరికిన దొంగలు మీరు,” అంటూ కేటీఆర్‌ తీవ్రస్థాయిలో విరుచుకుపడ్డారు. 

కిషన్ రెడ్డి గారూ! మీకో సూటి ప్రశ్న.
ఆ సాములతో అసలు సంబంధమే లేదన్నోళ్లు…ఈ స్కాము సీబీఐకి అప్పగించగానే చంకలెందుకు గుద్దుకుంటున్నరు?

మీ బండారమంతా కెమెరా కన్నుకు చిక్కినప్పుడే.. మీ వెన్నులో వణుకు మొదలైంది

అప్పుడు భుజాలు తడుముకున్న మీరు.. ఇప్పుడెందుకు వాళ్లను భుజాలపై మోస్తున్నారు?

— KTR (@KTRTRS) December 27, 2022