తెలంగాణ వార్తలు

కొత్త జిల్లాలు, కొత్త జోనల్ వ్యవస్థ ప్రకారం ప్రభుత్వోద్యోగుల విభజన ప్రక్రియను రాష్ట్ర ప్రభుత్వం వేగవంతం చేసి డిసెంబర్‌ 15లోగా పూర్తి చేయాలని లక్ష్యంగా పెట్టుకొంది. కనుక దానికి నిన్న షెడ్యూల్ కూడా జారీ చేసింది.  

డిసెంబర్‌ 8: సీనియారిటీ జాబితా తయారీ, పరిశీలన;

 డిసెంబర్‌ 9: సీనియారిటీ ప్రకారం ఉద్యోగుల నుంచి ఆప్షన్ల స్వీకరణ;

డిసెంబర్‌ 10: ఉద్యోగులు ఇచ్చిన ఆప్షన్స్ ప్రకారం సీనియారిటీ జాబితా సవరణ; 

డిసెంబర్‌ 11 నుంచి 15 వరకు: జిల్లా క్యాడర్ కమిటీ సమావేశాలు; 

డిసెంబర్‌ 15: కేటాయింపు ఉత్తర్వులు జారీ; 

డిసెంబర్‌ 15 నుంచి 22 వరకు : ఉద్యోగులు చేరికకు గడువు.  

స్థానిక సంస్థల ఎమ్మెల్సీ ఎన్నికలు జరుగుతున్న జిల్లాలలో అవి పూర్తయిన తరువాత ఈ ప్రక్రియ మొదలవుతుంది. మిగిలిన జిల్లాలలో పైన పేర్కొన్న షెడ్యూల్ ప్రకారం ఉద్యోగుల విభజన ప్రక్రియ పూర్తవుతుంది. రాష్ట్రంలో సుమారు 3 లక్షల మంది ఉద్యోగులను కొత్త జిల్లాలు, కొత్త జోనల్ వ్యవస్థలు, సీనియారిటీ, ఆప్షన్స్ ప్రకారం సర్దుబాటు చేయవలసి ఉంది. ఎక్కడ ఏ పొరపాటు జరిగినా మళ్ళీ పాలనాపరమైన, న్యాయపరమైన సమస్యలు ఎదుర్కోవలసి వస్తుంది. కనుక ప్రభుత్వం ఈ ప్రక్రియను పూర్తిచేయడంలో అన్ని జాగ్రత్తలు పాటిస్తూ ముందుకు సాగుతోంది. ఒకసారి ఈ ప్రక్రియ సవ్యంగా పూర్తయితే ఇకపై భవిష్యత్‌లో ఉద్యోగుల భర్తీ, బదిలీ, పదోన్నతులు వగైరా అన్ని చాలా సులువుగా పారదర్శకంగా జరుగుతాయి.