సంబంధిత వార్తలు
తెలంగాణ వార్తలు
ఎమ్మెల్సీ వెంకట్‌ రామిరెడ్డికి కోర్టు నోటీస్
టిఆర్ఎస్‌ ఎమ్మెల్సీ వెంకట్‌ రామిరెడ్డికి కోర్టు ధిక్కారణ నేరానికి పాల్పడినందుకు హైకోర్టు నోటీస్ పంపించింది. ఆయన సిద్దిపేట జిల్లా కలెక్టర్‌గా ఉన్నప్పుడు, జిల్లాలో రైతులు వరి పంట వేయవద్దని, వారికి వరి విత్తనాలు అమ్మవద్దని ఆయన మౌఖిక ఆదేశాలు జారీ చేశారు. ఈ సందర్భంగా రైతులు, విత్తన వ్యాపారులు కోర్టుకు వెళ్ళి అనుమతి తెచ్చుకొన్నా పట్టించుకోనని ఆయన అన్నారు. జిల్లా కలెక్టర్‌గా వ్యవహరిస్తున్న వెంకట్‌ రామిరెడ్డి కోర్టు ఆదేశాలను పట్టించుకోబోనని చెప్పడాన్ని తప్పు పడుతూ హైకోర్టులో ఓ పిటిషన్‌ దాఖలైంది. దీనిని కోర్టు ధిక్కారంగా పరిగణించాలని పిటిషనర్‌ కోరారు. దానిపై నేడు విచారణ జరిపిన హైకోర్టు ధర్మాసనం వెంకట్‌ రామిరెడ్డికి నోటీస్ జారీ చేసింది. నాలుగు వారాలలోగా సమాధానం ఇవ్వాలని కోరుతూ ఈ కేసు తదుపరి విచారణను వచ్చే నెలకు వాయిదా వేసింది.
