భూవివాదంతో మనస్తాపం... బిజెపి నేత ఆత్మహత్య
హైదరాబాద్‌లో ప్రముఖ రియల్ ఎస్టేట్ వ్యాపారి, బిజెపి నాయకుడు సంరెడ్డి వెంకట్‌రెడ్డి (65) మంగళవారం ఆత్మహత్య చేసుకున్నారు. తుర్కయాంజల్‌ మున్సిపాలిటీలోని తొర్రూర్ గ్రామస్తుడైన సంరెడ్డి వెంకట్‌రెడ్డి చిరకాలంగా రియల్ ఎస్టేట్ వ్యాపారం చేస్తున్నారు. కనుక ఆ రంగంలో ఉన్నవారికి ఆయన చిరపరిచితులు. గతంలో టిడిపిలో ఉన్న ఆయన ఇటీవలే బిజెపిలో చేరారు.
కొన్నేళ్ళ క్రితం ఆయన తొర్రూర్ గ్రామంలోని తా వ్యవసాయక్షేత్రం పక్కనే ఉన్న ఒక ఎకరంన్నర భూమిని కొనుగోలు చేసేందుకు ఓ వ్యక్తికి రూ.1.30 కోట్లు చెల్లించి ఒప్పందం చేసుకున్నారు. కానీ డబ్బు ముట్టిన తరువాత ఆ వ్యక్తి భూమిని రిజిస్ట్రేషన్ చేయకుండా వేధిస్తుండటంతో సంరెడ్డి వెంకట్‌రెడ్డి మంగళవారం తన పొలంలోకి వెళ్ళి అక్కడ ఒంటికి నిప్పంటించుకొని ఆత్మహత్య చేసుకున్నారు. స్థానికులు ఆయనను ఆసుపత్రికి తరలించినా 60 శాతంపైగా శరీరం కాలిపోవడంతో చికిత్స పొందుతూ మంగళవారం సాయంత్రం సుమారు 5 గంటలకు చనిపోయారు. సంరెడ్డి వెంకట్‌రెడ్డికి భార్య ఇద్దరు కుమార్తెలు, ఓ కుమారుడు ఉన్నారు. పోలీసులు కేసు నమోదు చేసుకొని దర్యాప్తు ప్రారంభించారు.
