డెంగీ జ్వరాలను అదుపుచేయరా? హైకోర్టు ప్రశ్న
తెలంగాణ రాష్ట్రంలో గతంలో ఎన్నడూ లేనివిధంగా డెంగీ, మలేరియా, స్వైన్ ఫ్లూ, వైరల్ జ్వరాల బారినపడుతున్న వారి సంఖ్య నానాటికీ పెరిగిపోతోంది. రోగులతో ప్రభుత్వాసుపత్రులన్నీ కిటకిటలాడుతున్నాయి. ముఖ్యంగా రాజధాని హైదరాబాద్‌ నగరంలో ఈ సమస్య తీవ్రత ఇంకా ఎక్కువగా ఉంది. వైద్య ఆరోగ్యశాఖ యుద్ధప్రాతిపదికన అనేక చర్యలు తీసుకొంటున్నప్పటికీ అవి ఏమాత్రం సరిపోవడం లేదు. దాంతో రోగులు నానా ఇబ్బందులు పడుతున్నారు. ఈ సమస్య తీవ్రత గురించి ప్రింట్ అండ్ ఎలక్ట్రానిక్ మీడియాలో రోజూ వార్తలు వస్తుండటంతో అవి హైకోర్టు ప్రధాన న్యాయమూర్తి జస్టిస్ రాఘవేంద్ర సింగ్ చౌహన్‌ దృష్టిలో కూడా పడ్డాయి.
ఇదే సమయంలో ఎం.కరుణ అనే వైద్యురాలు హైకోర్టులో ఓ ప్రజాహిత వాజ్యం వేశారు. రాష్ట్రంలో నానాటికీ విషజ్వరాలు పెరిగిపోతున్నప్పటికీ, రాష్ట్ర ప్రభుత్వం తగినంత చర్యలు తీసుకోవడం లేదని ఆమె పిటిషన్‌ ద్వారా ఫిర్యాదు చేశారు. ఆ పిటిషన్‌పై ప్రధాన న్యాయమూర్తి జస్టిస్ రాఘవేంద్రసింగ్‌ చౌహాన్‌, జస్టిస్ ఎ. అభిషేక్‌రెడ్డితో కూడిన ధర్మాసనం బుదవారం విచారణ చేపట్టి, ప్రభుత్వంపై తీవ్ర ఆగ్రహం వ్యక్తం చేసింది.
ఈ సందర్భంగా ప్రధాన న్యాయమూర్తి జస్టిస్ రాఘవేంద్రసింగ్‌ చౌహాన్‌ ఓ ఆంగ్లదినపత్రికను చూపించి దానిలో ఈ విషజ్వరాల గురించి వచ్చిన వార్తలను స్వయంగా చదివి వినిపించారు. రాష్ట్ర ప్రభుత్వం తీరుపై తీవ్ర అసంతృప్తి వ్యక్తం చేశారు. ప్రభుత్వం తరపున హాజరైన న్యాయవాది ఈ జ్వరాలకు సంబందించి వైద్యఆరోగ్యశాఖ తరపున అందించిన గణాంకాలను, నివేదికను జస్టిస్ రాఘవేంద్రసింగ్‌ చౌహాన్‌ తీవ్రంగా ఆక్షేపించారు. మీడియాలో వస్తున్న వార్తలకు ఈ గణాంకాలకు ఎక్కడా పొంతన లేదని ఆక్షేపించారు. తక్షణమే యుద్ధప్రాతిపదికన తగిన చర్యలు చేపట్టాలని లేకుంటే వైద్యఆరోగ్యశాఖ ముఖ్య కార్యదర్శికి సమన్లు జారీ చేసి కోర్టుకు పిలిపించవలసి వస్తుందని హెచ్చరించారు. ఈ కేసు తదుపరి విచారణను అక్టోబర్ 23కు వాయిదా వేశారు.
